Арба үстіндегі би зор құрметке лайық

©

«Маңғыстау-Арена» алып спорт кешенінде арбаға таңылған жандардың би жарысы өтті. Республикалық байқауда еліміздің сан түкпірінен өнерпаздар бас қосты. Тағдыр сынына мойымай, өмірден өз орнын табуға тырысқан жандар зор ерік-жігер, мол күш-қайратын танытты. Жиырма бес мүмкіндігі шектеулі биші ырғақты би қимылымен әуезді ән толқынында тербеліп, көрермен қошеметіне бөленді. Қоғам қолдауына мұқтаж, мүмкіндігі шектеулі болғанымен, ішкі жан дүниесі азат, рухы асқақ жандардың табанды еңбегі, жеңіске талпынысы, тынымсыз ізденісі зор сый-құрметке лайық. Әсерлі би ырғақтары әсем сазбен үйлесіп, үнсіз келісім тапқандай. Бишінің әрбір қимыл-қозғаласында терең астар жатыр. Өмір соқпағында бетпе-бет келген өткелдерді еңсеріп, тек алға адымдап, жарқын келешектен үміт үзбеудің ең үздік үлгісін көрсеткендей еді өнерпаздар. Бишілер бірнеше номинация бойынша өнер көрсетті. Арбаға таңылған жандар жеке және жұппен билеп, танго, твикс-степ, вальс сынды би өнерінің үздік жанрларын орындады. Сонымен қоса, еркін жанр шеңберінде өнерін ортаға салып,  ұшқыр ой-қиялына ерік бергендер де  болды. «Ақтауда арбаға таңылған жандар арасында би жарысы алғаш рет ұйымдастырылды. Өнерпаздар арасында Азия, Әлем чемпионаты және Азиялық параолимпиядалық ойындар жүлдегерлері бар. Алдымен бишілер еуропалық бағдарлама аясында өнер көрсетеді. Латын Америкалық бағдарлама мен жеке орындау номинациялары да бар. Жалпы ауқымды іс-шараның басты мақсаты- арбаға таңылған мүгедек жандардың арасында спорттық би түрлерін насихаттау. Сонымен қоса, Маңғыстау облысында арнайы би үйірмесінің ашылуына ықпал етсек деймін»,-деді ҚР Заманауи және спорттық би федерациясының президенті Әлия Түсіпбекова. Ерекше би өнерін тамашалауға қала тұрғындарының басым бөлігі қызығушылық танытты. Мүмкіндігі шектеулі жандардың табиғи таланты, ерек дарыны мен өнеріне таңданыспен қарағандар да кездесті. «Ерекше би орындалысын алғаш рет тамашалап тұрмын. Түрлі әсерге бөленесің. Ең бастысы бойыңда күш-қайрат пайда болады. Мүмкіндігі шектеулі жандардың өнеріне тәнті болдым. Өмірдің сынағына мойымай, табысқа қол жеткізуге ниетті жандарға құрметім зор»,-дейді қала тұғыны Руслан. Ауқымды іс-шара соңында әділ қазылар алқасы қорытындысы нәтижесінде жеңімпаздар анықталды. Combi 1 би бағдарламасы бойынша астаналық жұп Ардақ Отарбаев пен Айдана Бегленова, Combi 2 номинациясында Дастан Раушанбеков пен Кульшум Аталықов жеңімпаз атанды. DUO 2 сайысында Шымкент қаласынан Ермек Қалымбетов пен Айжан Жақулаева бас жүлдені иеленді. Аталған бишілер және т.б. республикалық байқау ережесіне сәйкес халықаралық жарыстарға жолдама алды.

Голрох Жеменей Суреттерді түсірген Серік Майемеров