Жол тәртібін жадыңда ұста!

©

Соңғы жылдары жол-көлік оқиғалары жиілеп кеткендігі рас. Бейқам балаларды былай қойғанда, естияр ересектер де жол апатына түседі. Осы орайда Маңғыстау облысының Қорғаныс істері жөніндегі департаментінде Ақтау гарнизонының әскери полиция өкілдері қатысуымен «Жол көлік оқиғасының алдын-алу» тақырыбында жиын өтті. Басқосуда темір тұлпарды тізгіндеген кез келген жан жол ережелері мен сақтық шараларын сақтауы тиістігі туралы сөз болды. Шара депаратаментің жылдық жоспарына сай айына бір рет автокөлік ұнатушылар бірлестігінің ұйымдастыруымен өткізіледі. Ақтау гарнизоны әскери полиция өкілдерінің  сөзіне сүйенсек, жол көлік оқиғалары тәртіп сақшылары жүргізетін насихат жұмыстарының нәтижесінде біршама азайған. Әскери қызметшілер орын алған жол-көлік оқиғаларынан бейне үзінділерге көз жүгіртіп, жол апатының әп-сәтте орын алуы мүмкін екендігін түсінгендей. Сонымен қоса, әскери полиция қызметкерлері гарнизонға қарасты әскери бөлімдер мен жергілікті басқару органдарының  автокөліктеріне жылдық техникалық  тексеру жұмыстарын жүргізді. Көліктердің жарамдылығы тексеріліп, арнайы газтексергіш құрылғының көмегімен техникалық ақаулар анықталды. Іс-шара соңында мамандар маңызды сауалдарға нақты жауап алып,  барша жүргізішілерді  барынша сақ болуға шақырды.

Голрох Жеменей