Мың алғыс, ақ желеңді абзал жандар!

©

Әлемдегі ең ардақты да құрметті мамандықтың бірі – дәрігерлік. Адам ауруы асқынып, дерті деңдеп, дауа іздегенде ақ халатты жандарға жүгінері анық. Осындай кезде тісқаққан тәжірибелі дәрігер науқасты дертінен құлан-таза айықтырып, аяғына тік тұрғызады. Жақында білімі мол, қолы алтын, жүрегі жылы, көңілі мейірімге толы ақ желеңді жандардың төл мейрамы өтті. Бұл қуанышты күнге орай, облыс әкімі Ералы Тоғжанов медицина қызметкерлерін кәсіби мерекесімен құттықтап, зор құрметке бөледі. Маңғыстау медицинасына сүбелі үлес қосып жүрген денсаулық сақшылары кәсіби мейрамында жүздері қуаныштан бал-бұл жанып, көңілдері шат-шадыман болды. Қызығы мен қиындығы қатар өрілген маңызды мамандықтың иелерін облыс әкімі Ералы Тоғжанов құттықтап, жылы лебізін білдірді: - Елбасымыз Нұрсұлтан Назарбаев халыққа Жолдауларында денсаулық сақтау саласына ұдайы назар аударып, медицина ғылымының дамуына, өркендеуіне серпін берген азаматтарды қолдап, халықтың денсаулығын түзетер, салауатты өмір салтына жетелер медициналық технологиясы озық орталықтар ашу қажеттігін әрдайым қадап айтады. Өзгенің өмірі үшін күресіп, ажалға араша болған, адам денсаулығына қауіп туғанда дер кезінде сейілте білген дәрігерлер қауымының ерен еңбегін, маңдай терін ескерусіз қалдыруға болмайды. Халық денсаулығының түзелуі, ел азаматтарының өмір сүру ұзақтығының артқаны, дертке ұшыраған адамдарға күрделі операция жасап, екінші өмір сыйлағаны – денсаулық сақшыларының зор еңбегінің жемісі. Тәуелсіздік алып, ел еңсесін тіктей бастағанда барлық салалар дамып, орасан жетістіктерге жетіп, биіктерден көріне бастады. Денсаулық сақтау саласы да елеулі өзгерістерге ұшырап, елімізде жоғары медициналық технологияларымен қаруланған, тәлімі зор, тәжірибесі мол мамандар бар емханалар, ауруханалар ашылды. Маңғыстау өлкесі де бұл ауқымды істерден шет қалған жоқ. Егемен алғаннан бері облысымызда 140 денсаулық сақтау нысаны, оның ішінде 112-і мемлекеттік, 28-і жеке меншік нысандар іске қосылған. Соңғы 15 жылда маңғыстаулықтардың орташа өмір сүру ұзақтығы 10 жылға артып, орта есеппен алғанда 73,5 жасқа дейін ұзарды. Күн сайын сырқатына ем-дом іздеген мыңдаған жандар дәрігерге жүгінеді. Күн сайын гинеколог-акушерлердің арқасында дүниеге жаңа өмір келеді. Осындай жарқын жетістіктерге жеткен, үнемі ізденісте жүрген, халыққа лайықты медициналық жәрдем көрсеткен дәрігерлерге шексіз алғысымды, риясыз ризашылығымды білдіремін,-деді ол. Кәсіби мейрамында өз ісінің шебері атанған медицина қызметкерлері марапатталып, құрмет пен мадаққа бөленді. ҚР Денсаулық сақтау министрлігінің «Еңбек ардагері» медалімен, «Денсаулық сақтау ісінің үздігі» төсбелгісімен, «Денсаулық сақтау ісіне қосқан үлесі үшін» төсбелгісімен, «Құрмет Грамотасы» және «Алғыс хатымен», облыс әкімінің «Алғыс хатымен» 50-ге жуық дәрігер марапатталды. - Бұл абыройлы мамандықты тізгіндегеніме 26 жылдай болған екен. Төл мерекесі қарсаңында еңбегім бағаланып, ҚР денсаулық сақтау министрінің «Денсаулық сақтау ісінің үздігі» төсбелгісімен марапатталдым. Өзім бүкіл отбасына қуаныш сыйлайтын балалар дәрігері - педиатрмын. Бүгінде педиатрлар тапшы, алайда Министрдің жаңа реформаларына сай, жоғары оқу орындарында педиатр мамандығына баулитын факультеттер қайта ашылды. Бұл оң өзгеріс педиатрлар қатарын көбейтетініне сенемін,-деді облыстық салауатты өмір салтын қалыптастыру орталығының директоры, денсаулық сақтау басқармасының бас педиатрі Нұрсұлу Аманбекқызы. Жас мамандарға үлгі-өнеге бола білген, технологиялар тапшы кезінде жоқтан бар жасап, ел саулығын ту етіп, адал қызмет еткен ардагер дәрігерлер де марапаттаудан құралақан қалған жоқ. Бірқатар майталмандарға ду қошемет үстінде «Гиппократ», «Авиценна», «Пирогов» төсбелгілері табысталды. Сондай-ақ мерекелік кеште сәбилерді ажалдан арашалап, екінші өмір сыйлаған дәрігерлер ардақталды. Ақ желеңді жандардың ыстық ықыласы арқасында толық айыққан балалардың ата-аналары медицина қызметкерлеріне алғыстарын жаудырды. Марапат пен алғысты арқалаған дәрігерлердің мерекелі кешінің соңы көңілді концертке ұласты.

Ханым ҚУАТ Суреттерді түсірген Серік МАЙЕМЕРОВ