Жеңімпаздарға құрмет көрсетілді

Маңғыстау облыстық әкімдігінде облыс әкімінің орынбасары Қаныбек Жұмашев «WorldSkills Kazakhstan» V республикалық кәсіби шеберлік чемпионатында жүлделі оралған студенттермен кездесті. Шараға республикалық чемпионаттың жеңімпаздары, сарапшылар, колледж директорлары, студенттердің ата-аналары және БАҚ өкілдері қатысты. Нұр-Сұлтан қаласында өткен «WorldSkills Kazakhstan» республикалық чемпионатқа 14 аймақтан және Нұр-Сұлтан, Алматы, Шымкент қалаларынан 38 құзыреттілік бойынша 400-дей қатысушы кәсіби шеберліктен сынға түскен еді. Оған Маңғыстау өңірінен 29 құзыреттілік бойынша 30 студент қатысып, бағын сынады. Нәтижесінде Маңғыстау жастары асқан шеберлігімен, ерекше білімімен көзге түсіп, жұлдыздары жанып, 4 алтын, 1 күміс, 4 қола медалін және 7 «Үздік маман» медалін иеленді. Сондай-ақ маңғыстаулықтар команда республика бойынша жалпы командалық ұпаймен 5-орынға шықты. Осындай қуанышты жаңалықтарын, жүлдеге толы қоржынын арқалап келген Маңғыстау студенттерін облыс әкімінің орынбасары Қаныбек Жұмашев қабылдап, аз-кем дидарласып, жеткен жетістіктерімен құттықтады. – Жалынды жастарымыз «WorldSkills Kazakhstan» чемпионатына қатысып, аймағымыздың намысын қорғап, мәртебесін көтеріп, үздік нәтижелерге қол жеткізді. Тартысты жарыста олар колледж қабырғасында оқып жатқан кәсібін шебер меңгергенін байқатып, ұстаздарының сіңірген еңбегін, сенімін ақтады десем артық айтпағаным. Сондықтан да жеңімпаздарға бағыт-бағдар беріп, шеберлігін шыңдаған колледж директорлары мен ұстаздарына шексіз алғысымды білдіремін. Жыл сайын чемпионатқа қатысушылардың саны артып келеді. Мысалы, 2015 жылы алғашқы чемпионатқа 2 құзыреттілік бойынша қатыссақ, қазірде құзыреттілік саны 29-ға жетті. Бұл көрсеткіш жылдан-жылға жастардың жұмысшы мамандықтарына деген қызығушылықтарының артып жатқанын көрсетеді. Жастардың жанарынан таңдаған мамандығына деген сүйіспеншілігін көріп, көңілім марқаяды. Бұндай толағай жетістіктер – студенттер мен ұстаздардың зор еңбегінің арқасы. Жастарды жеткен жетістіктерімен құттықтай отырып, болашақта білімді әрі шебер маман атануына тілектеспін, – деп жылы лебізін білдірді Қаныбек Бекболатұлы. «WorldSkills Kazakhstan» республикалық чемпионатының Маңғыстау облысы бойынша техникалық делегаты, Маңғыстау туризм колледжінің директоры Мирсат Айденұлы барша колледж директорлары мен ұстаздары атынан облыс әкімдігіне, облыстық білім басқармасына риясыз ризашылығын білдірді. «Біздің жастарымызға кәсібін жасауға жағдай көрсетіп, шеберлігін шыңдауға септесетін алаң бергені үшін аймақтағы кәсіпорындар мен мекемелерге зор алғысымды білдіргім келеді. Бұл жетістікке жетуіміздің басты құпиясы – ұстаздарымыздың студенттерді дұрыс жолға бағыттап, біліммен сусындатып, кәсіби шеберлігін шыңдауға мүмкіндік беруі. Сондай-ақ студенттеріміздің жеңіске ұмтылуы, биіктен көріну үшін бар күшін салғаны – бұның бәрі бізді жетістікке жетеледі», – деді Мирсат Айденұлы. Құттықтаулар мен жүрекжарды тілектермен қатар, қатысушылар облыс әкімінің орынбасарына ұсыныстарын да жеткізді. «Жеңіске жету оңай болған жоқ. «Алтын» медальға қол жеткізу үшін бәсекелестерімнен озуға көмектесетін білім мен зердені, алғырлық пен шеберлікті ту еттім. Кәсібімнің кәнігі шебер екендігін көрсеттім. «Дәнекерлеу ісі» – кез келген адамның тісі бата бермейтін мамандық. Оған асқан шеберлік, ерекше алғырлық керек. Мен чемпионатқа қатысар алдында «KCOI» компаниясы тәжірибе алмасуға, шеберлігімді шыңдауға мүмкіндік сыйлады. Сол үшін осы мекеме басшылығына рақметімді айтқым келеді. Біз жеңіске компаниялардың тәжірибе алаңдарын беруі  арқасында жеттік деп ойлаймын. Чемпионатқа қатысу үшін үлкен дайындық керек. Болашақта әкімдік жұмысшы мамандықтарға баулитын білім ордаларын жабдықтауға жәрдем көрсетсе деген тілегіміз бар», – деді Маңғыстау техникалық колледжінің 3-курс студенті, «Дәнекерлеу ісі» құзыреттілігі бойынша алтын медаль иегері Мерас Шонекбаев. Кездесу соңында жүлдегер атанған студенттердің ата-аналары, туыстары алғыстарын білдірді. Колледж директорлары мен ұстаздарға чемпионатқа кәсіби маман даярлап, жоғары нәтиже көрсеткені үшін облыс әкімінің орынбасары Қаныбек Жұмашевтың алғыс хаттары тапсырылды.

Ханым ҚУАТ