Worldskills: Жастарға ақ жол!

Достық үйінде жұмысшы мамандықтың кәсіби шеберлерін анықтау, қоғамда беделін көтеру, жастар арасында кеңінен насихаттауды мақсат тұтқан «WorldSkills» ұлттық чемпионатына қатысушы 30 студентпен «Шеберлікке қадам» атты кездесу өтті. Республикалық деңгейдегі чемпионатта өңіріміздің намысын қорғап, мерейін асыруды  көздеген 30 жалынды жаспен кездесуге Маңғыстау облыстық мәслихат хатшысы Нұри   Тумышев, облыстық мәслихат депутаты, «Форте Банк» АҚ филиалының директоры Аббат Өрісбаев, облыстық білім басқармасының басшысы Асқар Сейдалиев, аймақтағы техникалық және кәсіптік білім беру ұйымдарының директорлары мен ұстаздары қатысты. – Құрметті чемпионатқа қатысушы студенттер! «WorldSkills» ұлттық чемпионатына қатысушы, өз ісінің шеберлері студенттермен «Шеберлікке қадам» атты кездесуге қош келдіңіздер. Кәсіптік-техникалық білім беру саласына ерекше көңіл бөліп, еңбек нарығында бәсекеге қабілетті мамандар даярлау, жұмысшы мамандықтардың мәртебесін арттыруды мақсат еткен әлемдік жоба – «WorldSkills» чемпионатына қатысушы студенттер жылдан-жылға көбейіп келеді. 11–15 қараша күндері Нұр-Сұлтан қаласында дәстүрлі түрде бесінші рет өткізгелі тұрған чемпионатқа еліміздің барлық облыстарынан 38 құзыреттілік бойынша 400-дей қатысушы сынға түседі. Маңғыстау  өлкесінен 29 құзыреттілік бойынша 30 студент қатысады. Аймақтың құрама командасында қызмет көрсету саласы бойынша – 4, құрылыс саласы бойынша – 4, ІТ саласы бойынша – 11 және білім беру саласы бойынша 2 қатысушы бар. Олар өз салалары бойынша шеберліктерін көрсетеді деп сенемін. Жас достар, сіздер келешекте бәсекеге қабілеті зор, кәсіби шеберлігі жоғары, сұранысқа ие маман болатындықтарыңызға үмітім зор. Барлық қатысушыларға алдағы ұлттық чемпионатта сәттілік, жеңіс тілеймін! – деді облыстық білім басқармасының басшысы Асқар Әбиұлы. «WorldSkills» жобасын қолдап, студенттерді өз мекеме базаларында кәсіпке баулып, шеберліктерін шыңдауға, жұмысқа қабылдап, қарым-қабілеттерін өсіруге септескен жұмыс берушілер де, кәсіподақ ұйымдары да шараға қатысты. Оның ішінде «Медиана LTD» компаниясының бас директоры Қарлығаш Бекназарова, «Кибер» бағдарламалау мектебінің директоры Роман Гурбанов, «Ақтау машина жасау зауыты» компаниясы басшысының орынбасары Амангелді Бекенов, ҚР білім беру саласындағы қызметкерлерінің облыс бойынша кәсіподақ төрайымы Тарбия Анайбекқызы қатысушыларға сәттілік тіледі. Сондай-ақ кездесуде студенттерді дайындап, жарыс додасына қосқан ұстаздар да келіп, ой-пікірлерін білдіріп, ұсыныстарын айтты. Мәселен, облыстық туризм колледжінің мұғалімі, ұлттық чемпионаттың қонақ үй әкімшілігі құзыреттілігі бойынша бас сарапшысы Наталья Киргинцева жарыста жеңіске жеткен жастарды басқа студенттерге үлгі етіп, беделін көтеріп, тәлімгер ету қажеттігін алға тартса, Маңғыстау техникалық колледжінің шебері, «дәнекерлеу технологиясы» құзіреттілігі бойынша бас сарапшы Бақытжан Малчибаев жұмысшы мамандықтарға баулу үшін қажетті технологиялардың тапшылығын тілге тиек етті. Онымен қоса сарапшылар үздік студенттердің тәжірибесін арттыру үшін бүгінде шетелдерде тағылымдамадан өту, ағылшын тілін білу қажеттілігі өткір тұрғанын айтты. Кездесу барысында ұлттық чемпионатқа аттанар жастар да сөз алып, еркін сұхбат құрды. Олардың ішінде 2017 жылы «WоrldSkills AbuDhabi» әлемдік чемпионатына қатысып, ерекше қабілетімен көзге түскен Еркебұлан Сұлтанғалиев, биыл Казань қаласында «JuniorSkills Kazan – 2019» халықаралық деңгейдегі чемпионатта жүлделі орын иеленген Ердәулет Тұрар да тәжірибелерімен бөлісіп, кеңестерін айтты. Маңғыстау облыстық мәслихат хатшысы Нұри Тумышев пен облыстық мәслихат депутаты, «Форте Банк» АҚ филиалының директоры Аббат Өрісбаев жалынды жастарға жүрекжарды лебіздерін арнап, сәттілік тіледі. Кездесу соңында Асқар Сейдалиев Маңғыстау облыстық «WоrldSkills Aktau» командасының капитаны Бахтияр Мырзагелдиевке команданың туын ұсынып, қатысушыларға аймақ басшысы Серікбай Трұмовтың атынан сыйлықтар табыс етті.

Ханым ҚУАТ