Жастар ісі жөніндегі Кеңестің отырысы өтті

Жұма күні «Достық үйі» ғимаратында Маңғыстау облысы әкімі Серікбай Трұмовтың қатысуымен облыс әкімдігі жанындағы Жастар ісі жөніндегі Кеңестің отырысы өтті. Оған аймақтың белсенді жастары қатысып, өңірдің дамуына үлес қосар ұтымды ұсыныстар, берекелі бастамаларды көтерді.   Алқалы жиынға елдің ертеңіне сеніммен көз тігіп, білімге ұмтылып, асқақ қасиеттерді бойына сіңіріп, жасампаздық жолына түскен жалынды жастар жиналды. Барлығының мақсаты бір – кеңес отырысы аясында аймақ басшысына көкейіндегі көкейтесті ойларын жеткізу, қоғам дамуына серпін тигізер ұсыныстар айту, пікір таластыру, ой бөлісу, жамандықтан жиреніп, жақсылыққа үндеу. Еркін форматта өткен отырыста алғашқы сөз алған Маңғыстау телеарнасының редакторы, «Сөз бен саз» авторлық бағдарламасының жүргізушісі Бердіхан Алмен өлкеміздің мәдениет саласындағы өзекті мәселелерді қозғады. Ол жыр әлемін таңдаған жастарға көптеп грант бөлу, Ақтан Керейұлы, Сүгір Бегендікұлы жыраулардың есімдерін халыққа дәріптеу, қала ортасындағы Тобанияз Әлниязұлының ескерткішін жаңарту, Пір Бекет атаның 270 жылдық мерейтойына орай, күйші, жыршы, термешілер арасында сайыстар ұйымдастыру, жаңажылдық шыршаға бөлінер қаржыны азайтып, 22 наурыз ұлыс күніне беру сынды өткір ұсыныстарын айтты. Ал «ӨзенМұнайГаз» акционерлік қоғамының «Жас мамандар кеңесінің» мүшесі Сәнім Мұрадова жастар арасындағы нашақорлықтың жолын кесуін, көп жандардың құмар ойынына айналған заңсыз букмекерлік кеңселердің жабылуын талап етіп қана қоймай, жастар жылына орай жарқын жобалар ұйымдастыруды ұсынды. Сондай-ақ жастар жиынында ішкі туризм, ғылым жобаларымен айналысу, жас кәсіпкерлерге көмек секілді түйткілді мәселелер қозғалды. Аймақ басшысы Серікбай Трұмов барлық сауалдарға толық жауап беріп, шешілмеген мәселелерді бақылауға алып, тиісті органдарға тапсыратынын жеткізді. Және қоғамдық мәселелерге бейжай қарамай, алаңдап жатқаны үшін жастарға ризашылығын білдірді.

Ханым ҚУАТ