Маңғыстауда 116 мың тұрғын «DamuMed» мобильді қосымшасын жүктеген

Маңғыстау облысы 2018 жылдың 1 сәуірінен бастап медициналық құжаттаманы қағазсыз жүргізу бойынша пилоттық жобаға енді. Қоғамдық денсаулық сақтау қызметі бөлімінің басшысы Ғалым Алтураевтың айтуынша, 2017 жылы Медициналық ақпараттық жүйе 4 денсаулық сақтау ұйымында болса, бүгінде 34 ұйымға (29 – мемлекеттік, 5 – жеке меншік) енгізілген.

Маңғыстау облысында 89 медициналық нысанның барлығы 100 пайыз интернет желісімен қамтамасыз етілген. 2612 жұмыс орны 98 пайызға компьютерлік техникамен жабдықталған. 5911 медициналық қызметкер министрлік порталдарының пайдаланушылары болса, қазіргі таңда 321 032 емханаға келуіш цифрлық біліммен оқытылған.

- Облыста 20-60 жас аралығындағы 345 мың интернетбелсенді халық бар. Олардың 116 357-сі «DamuMed» мобильді қосымшасын пайдаланушылар. Сонымен қатар облыстағы барлық медициналық ұйымдарға тіркелген халық саны 676 109 болса, оның 636 016-сының электронды денсаулық куәліктері толтырылған. МАЖ-де 1 709 840 адам медициналық қызмет алған, - дейді Ғалым Бисенбайұлы.

Медицина саласын цифрландыру мақсаты:

- дәрігерлер мен емделушілердің уақытын 50 пайызға дейін үнемедеу;

- тұрғындардың емханаға, ауруханаға келу уақытын екі есеге дейін қысқарту;

- зертханалық тексеріс нәтижелерін күту уақытын қысқарту;

- тірі кезекті 30 пайызға төмендету;

Сондай-ақ медициналық ақпараттық жүйеде:

- тұрғындардың медициналық куәліктеріне қолжетімділік;

- стационарлардан және жедел жәрдемнен активтердің емханаларға автоматты түрде түсуі;

- цифрлы флюоротека;

- медициналық құжаттарды ішінара пайдалану;

- қарау және дәрігерге дейінгі кабинеттер жолға қойылған.

- «DamuMed» мобильді қосымшасы арқылы еңбекке жарамсыздық парақтары мен лабораториялық зерттеулердің нәтижелерін алуға болады. Сондай-ақ дәрігерді үйге шақыру қызметі, дәрігерге онлайн жазылу мүмкіндігі қарастырылған. Тексерістен өтуіңіз қажеттігі жөнінде (прафилактика, скрининг, флюорография т.б.) ескертпе келіп тұрады. Қосымшаның «Менің денсаулығым» бөлімі тіркеуде тұрған жүкті әйелдерге қызмет етеді.

Жүйе қолданысқа енгізілгеннен бастап 49 347 дәрігерді үйге шақыру қызметі орындалған. Оның 21 мыңнан астамы мобильді қосымша арқылы жүргізілген.

Айта кетерлігі, денсаулық сақтау саласындағы цифрлық мүмкіндіктерді пайдалануда Ақтау қаласымен қатар, Жаңаөзен қаласы, Түпқараған, Мұнайлы аудандары белсенділік танытып келеді.

Теңге БЕКМҰРЗАЕВА