Ақтауда қоқысты бөліп салуға арналған контейнер орнатылды

Ақтауда 5 шағынаудан 8 үйдің жанына қоқысты бөлек-бөлек сұрыптап, жинайтын контейнер онрнатылды. Жәшікке қағазды, пластикті және тұрмыстық қатты қалдықтарды салатын бөліктері бар. Сонымен қатар баланың бойы жететіндей, ыңғайлы қоқыс салатыны да бар. Түрлі-түсті контейнерді «Caspiy operating» ЖШС орнатқан.

«Жәшікті Caspiy operating қаржысына жасадық. Контейнердің бір ерекшелігі онда қоқыс толғанын хабарлайтын дыбысты тетік пен өртсөндіру жүйесі орнатылған. 15 қарашада түрлі-түсті контейнерлердің таныстырылымы өтетін болады. Оған дейін бұл контейнер қалай жұмыс жасайтынын бақылаймыз. Одан жақсы нәтиже болса, өзге шағынаудандарға контейнерді орнататын боламыз. Біз сондай-ақ Баянды ауылында да қоқысты бөлек сұрыптап салатын контейнер орнатуға келісімшартқа отырдық. Алдағы уақытта таныстырылымы өтетін болады», - деді «Caspiy operating» ЖШС директорының орынбасары Әділет Пірімқұлов.

Қалада көп галерейлі үй бар. Тұрғындар қоқысты әрбір қабаттағы қоқыс салғышқа тастайды. Caspiy operating-тен бұл үйлердің қоқысты бөлек сұрыптап салу мәселесін қалай шешуге болады деп сұрағанымызда:

«Ол галереялы үйлерде қоқыс салғыштарды кондоминимум шешу керек. Егер рұқсат берсе, ол контейнерлерді басқа жерге алып тастап, қоқыс салғышты жапсақ жақсы болар еді. Тұрғын-үй коммуналдық шаруашылығы ол мәселені тұрғындармен бірге шешу керек», - деді Әділет Пірімқұлов.

Асылзат ӨСЕРҚЫЗЫ

Суретті «Caspiy operating» ЖШС ұсынды

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.