Мүмкіндігі шектеулілер волейболдан үздікті анықтады

Мүмкіндігі шектеулі жандар арасында жағажай волейболынан ел чемпионаты қорытындыланды. Сайысқа барлығы 7 команда қатысты. Бұл жөнінде халықаралық дәрежедегі төреші, Маңғыстау облыстық мүгедектер клубының басшысы Құлышев Нұралы мәлімдеді.

Финалға Түркістан облысы мен Ақтау қаласы командалары шықты. Олар осымен ақтық сында 7-рет кездесіп отыр және бұл жолы да ақтаулық команда жеңіске жетті.

Жаңаөзен және Қызылорда құрамалары үшінші орын үшін бақ сынап, Қызылорда командасы басым түсті. Сонымен, Ақтау – 1 орын, Түркістан облысы – 2, Қызылорда қаласы – 3 орынға ие болды.

Ал мемлекет қайраткері, генерал-лейтенант Амангелді Шардарбаевқа арналған жағажай волейболынан өткен халықаралық турнирде 8 команда бақ сынады. Жартылай финалға Омск, Латвия, Қызылорда және Жаңаөзен құрамалары шықты. Нәтижесінде, Жаңаөзен – 1, Қызылорда – 2, Латвия – 3 орын қанжығалады.

Жеңімпаздар алғыс хатпен, медаль және кобоктармен марапатталды.

Теңге БЕКМҰРЗАЕВА

Суреттер Нұралы Құлышевтан алынды

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.