Ақтауда бос жұмыс орындары туралы ақпарат беретін мобильді қосымша іске қосылды

©

Ақтауда бос жұмыс орындары бойынша ақпарат беретін мобильді қосымша іске қосылды. Бұл туралы Ақтау қаласы әкімдігінің сайтында хабарланды.

«CZ Aktau» атты мобильді қосымшасын «Ақтау қаласы әкімдігіне қарасты халықты жұмыспен қамту орталығы» МКМ бастамасымен «Ақтау серпіні» жобасы шеңберінде іске қосқан. Қосымша арқылы қала тұрғындарына еңбек нарығындағы ашық, маңызды және өзекті ақпараттарды алуға болады.

Сайттың хабарлауынша, барлық қаладағы жұмыс іздеушілер мен жұмыс берушілерге арналған ақысыз мобильді қосымша пайдаланушыларға мынадай мүмкіндіктер береді:

• Кәсіби бағдарлауға қатысты тест өту;
• Бос жұмыс орындарын іздеу;
• Жастар практикасы бойынша оңай ақпарат алу;
• Хабарландыру (жоспарланған іс-шаралар, курстар, жәрмеңкелер, шеберлік сабақтары,  шағын аукциондар тізімі және т.б.);
• Жұмыс іздеушілер мен жұмыс берушілерге арналған пайдалы ақпарат (түйіндемені қалай жазу керек, әңгімелесу кезіндегі сұрақтарға қалай жауап беру керек, жұмыс берушінің құқықтары мен міндеттері);

Қосымшаны «GooglePlay» мен «AppStore» дүкендерінен жүктеуге болады.

- Жұмыспен қамту орталығы ізденушілер мен жұмыс берушілердің ең үлкен базасына ие қаладағы жалғыз мемлекеттік орган болып табылады. Жұмыспен қамту орталығы жұмыс іздеушілерге жұмысқа орналасуға, ал жұмыс берушілерге білікті мамандар табуға жәрдемдеседі. Қазіргі таңда жұмыспен қамту орталығы қызметтердің кең ауқымын ұсынатын әмбебап алаң ретінде дамып жатыр, - деді Ақтау қаласы әкімдігінің халықты жұмыспен қамту орталығы МКМ-нің басшысы.

[gallery td_select_gallery_slide="slide" ids="46388,46387,46384"]