Майталман мұнайшылардың мектебі болған цех

©

Өткен жылы өндірісті өңірімізде Маңғыстау мұнайының 55 жылдығы, «Жетібаймұнайгаз» өндірістік басқармасының 50 жылдық мерейлі мерекелері тойланған-ды. Жетібай жерінің бетіне мұнай атқылап, ел игілігіне ырыздық-несібе тарту еткен күн елдің есінде қалатындай мән-мазмұнды өтті. Бүгін Жетібайдан басталған жылнаманың жарқын беттерін ашқан «Жетібаймұнайгаз» өндірістік басқармасындағы №1 мұнай және газ өндіру кәсіпшілігінің бүгінгі тыныс-тіршілігі төңірегінде әңгімелемекпіз.   Жетібай, Оңтүстік Жетібай, Айрантақыр, Придорожный, Ащыағар, Алатөбе, солтүстік Аққар, солтүстік Қарағия, Атамбай-Сортөбе, Оймашы кенорындары  №1 мұнай және газ өндіру цехына қарайды. Мұнда жиырма төрт топтық қондырғы мен екі айдау стансасы жеті қабат жер қойнауынан күні-түні мұнай өндіруде. Цехта инженерлік техникалық қызметкерлермен қоса мұнай және газ өндіру операторлары, слесарь-жөндеушілер, техникалық су қыздыру қондырғысының операторлары, газбен есуші, электр-газбен дәнекерлеуші және тағы басқа да мамандықтар бойынша 160-тан аса мұнайшы еңбек етеді. Сонау еңбек вахтасында 1965 жылдан бері мұнайшылардың бірнеше буыны ауысты. Бұл цех– бұрынғы Үкімет басшысы марқұм Нұрлан Балғынбаев, қазақ мұнай өнеркәсібінің майталмандары, білікті басшылары Төлеген Хасанов, Сейсенғали Өтеғалиев, Абат Нұрсейітов, бірінші вице-министр Алик Айдарбаев, «Маңғыстаумұнайгаз» акционерлік қоғамының басшыларының бірі Жетібай Төлеғожаев үшін де еңбек жолының бірінші парағы... – Қазіргі таңда кенорындарында көлденең бұрғылау, оқпандап қазу, ұңғыны қышқылды сұйықтықпен жару, су айдайтын ұңғыларды толқынды соққылаумен өңдеу әдістері қолданылады. Соңғы жылдары озық технологиялар өндіріске батыл енгізілді. Қалыптасқан қарқынды еңбектің арқасында мұнай өндіру көлемін жылдан-жылға арттырып келеміз. Ұңғылардың өнімін ұлғайту мақсатында геологиялық-техникалық шаралар жасалып, 67 ұңғы қосымша өнім өндіруден оң нәтиже көрсетті. Бүгінгі таңда кенорындарындағы негізгі және қосалқы мұнай құбырлары, жұмыс істеп тұрған 420 ұңғының барлығы шыны-пластикалық құбырмен қамтамасыз етілген. Құбырлардың жарылуы, мұнай қалдықтарының жерге төгілуі тоқтатылды, – деді  цех басшысы Әділбек Әкімиязов. Әділбек Нұрғалиұлының айтуынша, қазан айындағы көрсеткіш бойынша тәуліктік мұнай өнімі 2700 тоннаны құрап, цех межеленген жоспарды 33 тоннаға артығымен орындаған.  №1 мұнай және газ өндіру кәсіпшілігіндегі инженерлік-техникалық қызметтер толығымен компьютерлік жүйемен жұмыс істейді. – Қалыптасқан дәстүрге сай бірінші цех бірінші болып, көш басындағы тұғырынан түспеуі тиіс. Біздің цех – майталман мұнайшылардың мектебі болған орын. Біз осы жауапкершілікті жете түсініп, абыройлы еңбек етуге тырысамыз. Еңбегің жанып, өз ортаңның беделді маманы болу үшін, өзіңе берілген жұмысты тиянақты орындау шарт. Ең бастысы цехта қауіпсіздік техникасын қатаң сақтау қажет. Цехта өндірістік қауіпсіздік, жұмыс барысында апаттың алдын алу, қауіпсіздік техникасына байланысты шаралар уақытында жүзеге асырылып отырады. Таңертең үйінен жұмысқа кеткен азамат отбасына аман оралуы тиіс. Ал қауіпсіз еңбек бар жерде табыс та болатыны сөзсіз. Біздің ұжым осы қағиданы берік ұстанады. Жылдан-жылға іс-тәжірибемізді шыңдап, озат еңбеккерлер қатарынан көрінуге тырысып келеміз, – деді цех басшысы. Цех мұнайшылары еңбекте де, қоғамдық шараларда да белсенділік танытып жүр. Мәселен, «Үздік маман – 2017» кәсіби біліктік байқауының облыстық деңгейдегі «Үздік оператор» аталымының жүлдегері Сәкен Саметдинұлы мен «ҚазМұнайГаз» ҰК» АҚ еншілес компаниялары арасында өткен сайыста «Үздік слесарь-жөндеуші» атанған Абдол Бижанов №1 мұнай және газ өндіру цехында қызмет етеді. Цех геологтары Байсары Дүйсенбаев, Жомарт Құдайбергенов, Қайрат Ходжаев «Маңғыстаумұнайгаз» акционерлік қоғамы жанындағы жас мамандар кеңесі құрамында мемлекеттік жастар саясатын іске асыруға белсене атсалысып жүрсе, слесарь-жөндеуші Кенжебек Оңғалиев пен оператор Ержан Мұратбаев «Жетібаймұнайгаз» өндірістік басқармасы футбол және волейболдан ардагер спортшылардың құрама командасында. Мұнай операторы Талғат Жақыпов - облыс, республика сахналарында өнер көрсетіп, компанияның мерейін арттырып жүрген өнерпаз. Мұндай жетістіктер – цех басшылығының ұжымдағы жұмысының жарқын көрінісі. Қазыналы мекенімізде өндіріліп жатқан қара алтын қоржынында «Жетібаймұнайгаз» өндірістік басқармасының №1 мұнай және газ өндіру цехы жұмысшыларының маңдай тері, еселі еңбегі жатыр. Татулығы мен бірлігі жарасқан ұжымның әр күні табыстармен өрнектелетініне сенім мол.

Фарида МҰҢАЛҚЫЗЫ