Фестиваль «Қазақстанның Еңбек Ері», КСРО халық әртісі, Қазақстанның халық әртісі Асанәлі Әшімовтің 80 жылдығына орайластырылып отыр. Бүгін Н. Жантөрин атындағы Маңғыстау облыстық музыкалық драма театрында Каспий жағалауы елдерінің I халықаралық театр фестивалінің ашылу рәсімі өтті.
Шараның мақсаты - Каспий жағалауы елдерінің театр өнері саласындағы ынтымақтастығын күшейту мен мәдени және рухани байланыстардың одан әрі нығаюына үлес қосу.
Фестивальге қатысуға Каспий жағалауы және түркі тілдес елдердің кәсіби драма және музыкалық-драма театрлары шақырылды. Әр елден классикалық немесе ұлттық репертуарлық қойылымымен бір театр ұжымы ұсынылады.
Мәдени шараға жиналған қауым театр фойесінде актердің өмірі мен өнерінен сыр шертетін көрмені тамашалауға да мүмкіндік алды.
Халықаралық өнер фестиваліне Ресей, Әзірбайжан, Иран және Қазақстан театрлары қатысқалы отыр. Олар: «Ноғай Мемлекеттік драма театры» мемлекеттік бюджеттік мекемесі (Ресей, Дағыстан Республикасы, Ноғай ауданы); М. Әуезов атындағы Қазақ Мемлекеттік академиялық драма театры (Қазақстан, Алматы қ.); ЙУГ Мемлекеттік театры (Әзірбайжан, Баку қ.); Астрахан облыстық «Астрахан драма театры» мемлекеттік автономиялық мәдениет мекемесі (Россия, Астрахан қ.); Айна театр тобы (Иран, Табриз қ.); Н. Жантөрин атындағы Маңғыстау облыстық музыкалық драма театры (Қазақстан, Ақтау қ.).
Фестиваль аясында қойылымдар тегін көрсетіледі.
-Барлығыңызды бүгінгі ұлы мейраммен құттықтаймын. Театр әр уақытта халықтыкі, барлық қызметіміз сіздер үшін. Өнер адамдарына шабыт беретін сіздердің ыстық ықыластарыңыз, бізге деген көңілдеріңіз бен ниеттеріңіз. Бұл – кейінгі тарихта алтын әріппен жазылатын дүниелердің бірі. Біздің дарынды, талантты халық, дарынды ұл-қыздарды туғызбай қоймайды. Сондай ұрпақ көбейсін, келешегіміз кеңейсін, қуаныштарыңыз мол болсын. Сіздерге үлкен ілтипатпен басымды иемін, - деп халыққа құрметін білдірді Асанәлі Әшімов.
Ашылу рәсіміне өнер саңлағы Асанәлі Әшімовтің отбасы, дос-жаран, әріптестері мен ізбасарлары да келді. Сондай-ақ, фестивальге қатысушы театрлар, бірқатар өнер майталмандары, қала тұрғындары жиналды.
Тағы оқыңыздар: Фестиваль аясында баспасөз мәслихаты өтті -Біз жас кезімізде Асанәлі ағаның туындыларымен өстік, санамызды қалыптастырдық. Асанәлі аға – қазақтың маңдайына біткен дара жұлдызы. Алты мемлекеттің өнер майталмандары қатысып отырған бүгінгі фестиваль – ерекше фестиваль. Өйткені 80 жылын тойлағандар көп, бірақ осылай бүкіл ел, бірнеше мемлекет жиналып тойлағандары некен-саяқ. Тойыңыз құтты болсын! – деп облыс басшысы Ералы Тоғжанов ақ тілегін білдірді.Каспий жағалауы елдерінің I халықаралық театр фестивалінде театр және кино режиссері, Қазақстанның халық әртісі Талғат Теменов, Түркия Мәдениет және Туризм министрлігі Мемлекеттік театрлары бас директорының орынбасары, режиссер және актер Эрдал Кючюккемюрчю (Анкара, Түркия), театр сыншысы, блогер, Грузия заманауи театрларды зерттеу орталығының бас директоры Лаша Чхартишвили, профессор, халықаралық театр сыншылары ассоциациясының мүшесі Исрафил Исрафилов (Баку, Әзірбайжан), режиссер, профессор, тәуелсіз «Платиналы Тарлан» сыйлығының лауреаты, «Парасат», «Барыс» ордендерінің иегері Есмұхан Обаев, ҚР еңбек сіңірген қайраткері, театр және кино актері, продюсер Азамат Сатыбалды әділ қазылық етеді.
Фестиваль 24-28 тамыз аралығында өтеді. Осы күндері көрермен қатысушы театрлардың туындыларын тамашалай алады.
Теңге БЕКМҰРЗАЕВА
[gallery ids="33600,33599,33602,33601"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
