Маңғыстау жастары Елбасы жолдауына қолдау білдірді

«Достық үйінде» Маңғыстау облыстық «Қоғамдық келісім» мекемесінің ұйымдастыруымен ҚР Президентінің Жолдауын қолдау мақсатында Маңғыстау жастары арасында дөңгелек үстел өтті. Оған Маңғыстау облысы жастар саясаты мәселелері басқармасы, Ақтау қалалық жастар орталығы, Маңғыстау облысы жастар ресурстық орталығы, «Келешек» жастар қанаты, «Ұрпақ Next» ЖҚҚ, ҚХА жанындағы «Жас қанат» жастар ұйымының мүшелері қатысты.

Елбасының «Қазақстанның үшінші жаңғыруы: жаһандық бәсекеге қабілеттілік» Халыққа жолдауына қолдау білдіру  және жастар арасында насихаттау мақсатында өткен жиынды «Қоғамдық келісім» мемлекеттік мекемесінің басшысы Амангүл Жайылханова сөз сөйлеп, ашып, жүргізіп отырды.

Дөңгелек үстелге жиналған жастардың пікірлерін тыңдау қатысушыларға кезегімен сөз берілді. Алғашқы болып сөз алған Жұмагүл Сәтенова:

— Елбасы бүгінгі жастардан сапалы еңбек ету, техниканы меңгеруді күтіп отыр. Тегін кәсіптік техникалық білім беруді – жұмысшы мамандығын алуға жағдай жасалып отыр. Бұл әсіресе, мүжәлсіз отбасылар балаларына көрсетіліп отырған көмек. Мамандығы бойынша жұмыс таппай жүрген жастардың мамандығын өзгертуге мүмкіндігі бар. Шағын бизнес бастауға, өз кәсіпкерлігін жүргізуге мүмкіндік мол,-деді.

«Ұрпақ Next» жастар қоғамдық бірлестігінің жетекшісі Гүлжанат Мұратбай:

— Биылғы жолдаудың ерекшелігі – жастарға көп мүмкіндік ашылып отыр. Аудандарда тұратын жастарды осы бағдарламаның арқасында Мәскеуге тегін оқуға жіберіп, қазір олар мамандық алып келіп, жұмыс жасап отыр. Өзім жеке кәсібімді ашып, 20-30 адамның басын біріктіріп басқарып отырмын. Мемлекет тарапынан көп көмек көріп отырмын. Жеке балабақшам бар. Соған субсидия алып отырмын. Біз мемлекет беріп отырған жәрдемді пайдаланып, өз мүмкіндіктерімізді жасауымыз керек,-деп, өз іс-тәжірибесімен бөлісті.

«Ақ жол – жастар» жастар қанатының баспасөз хатшысы Жанұзақ Қойшығұлов, «Қаражанбасмұнай» «Келешек» жастар қанаты жетекшісі Данияр Оралов өндіріс саласындағы жастар атынан Елбасы жолдауына қолдау білдірді. Сонымен бірге, Маңғыстау облысы жастар ресурстық орталығы маманы Айнұр Айтжанова, әлеуметтанушы Нұрбек Өтегенов, Ассамблея жанындағы  «Жас қанат» - жастар қанаты мүшесі  Шапағат Үсенов,  «Қоғамдық келісім» мекемесінің маманы Мұқаш Оралбаев т.б. жолдауда көтерілген «Медициналық сақтандыру», «Нұрлы жер» т.б. түрлі мәселелер туралы пікірлерін ортаға салып, қолдау білдірді.

Үміт ЖӘЛЕКЕ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.