©
Бүгінгі күні АИТВ/ЖИТС – бұл обьективті шынайылық, оған немқұрайлы қарау мүмкін емес. Ішімдік, нашақорлық, ерте жыныстық қатынасқа түсу, жыныстық серіктестіктерді жиі алмастыру, мүшеқапты қолданбау – АИТВ жұқпасын жұқтырудың қаупін күшейтеді.
АИТВ дегеніміз не?
АИТВ – адамның иммун тапшылығының вирусы. Бұл вирус адамның иммунитетін зақымдап, ағзаның түрлі ауруларға әлсіз болуына әкеп соғады.
АИТВ жұқтырған адам ұзақ уақыт бойы өзінің жұқтырғанын білмеуі мүмкін, себебі АИТВ жұқпасының белгілері біраз уақыт бойы байқалмайды және басқа аурулардың белгілеріне ұқсайды.
ЖИТС дегеніміз не?
ЖИТС – жұқтырылған иммун тапшылығының синдромы – АИТВ салдарынан туындаған ауру. ЖИТС – АИТВ жұқпасының соңғы сатысы.
АИТВ – жұқпасын емдеу мүмкін емес!
Себебі, бүгінгі таңда АИТВ/ЖИТС ауруын толық емдеп шығаратын дәрі-дәрмектер әлі табылған жоқ. Вирус адам ағзасында өмір бойы қалыптасып қалады. Бірақ, АИТВ ауруының ең соңғы сатысы - ЖИТС-ке ұшырауға жол бермейтін, ағзадағы вирустың таралуын тежейтін препараттар бар.
Есіңе сақта!
АИТВ жұқпасының негізгі берілу жолдары:
1.Жыныстық қатынас арқылы:
-Қорғалмаған жыныстық қатынасқа түскенде.
2.Қан арқылы:
-АИТВ жұқтырған адамның қанын құю немесе донор тінін, ағзаларын трансплантациялау кезінде.
-Есірткіні ине арқылы тұтыну кезінде біреудің инесін немесе шприцін пайдаланғанда.
-Денеге сурет салу және пирсингке арналған жалпы қолданыстағы залалсыздандырылмаған құралдарды пайдаланған кезде. Басқа адамның ұстара құралдары мен тіс щеткаларын пайдаланғанда.
3.АИТВ жұқтырған анадан балаға:
-Жүктілік, босану және емізу кезінде.
-АИТВ жұқпайды!
-Қол алысып құшақтасқанда,
-Жәндік шаққанда,
-Сүйіскенде,
-Жөтелу немесе түшкіру кезінде,
-Ортақ ыдыс-аяқ қолданғанда,
-Орамал, төсек-орын арқылы,
-Әжетхана, душ арқылы.
Назар аударыңыз!
ЖИТС ауруын жұқтырдым деген қаупің болса...
Сенің жұқтырғаныңды білу үшін зертханалық тексеруден өтуің керек. Ол үшін тамырдан қанның азғана мөлшері алынады. Мекенжай бойынша кез-келген емханада немесе облыстық ЖИТС орталығында тестілеуден ақысыз, құпия және жасырын түрде өтуге болады.
Қорыта айтқанда,
АИТВ-жұқпасы адамзатқа төнген қауіп екендігін ескеріп, әдепті өмір сүріп, арақ-шарап ішуден, наша тартудан, кездейсоқ жыныстық жақындасудан аулақ болса, әрбір адам өзін-өзі ЖИТС-тен қорғай алатыны кәміл.
Бекбосынова Нұрсая
Жетібай ауылдық ауруханасы:
Дәрігер эпидемиолог
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
