Ұлық мереке ұлықталды

©

Қазақстан Республикасы тәуелсіздігінің 25 жылдық мерейлі мерекесі Қарақия ауданында кең көлемде тойланды. Жалпы ел тәеуелсіздігі  мерекесі қарсаңында аудан мен ауылдардың әрбір бөлім, мекемелері мен мектеп, балабақшаларында арнайы жоспар жасақталып мерейлі мерекеге орай түрлі спорттық, өнер сайыстары, көрмелер, мүшайра, сурет салу сайыстары өтті. Еліміздің денсаулық, білім беру салаларына еңбегі сіңген бұл күнде арамызда жоқ ардагерлер құрметіне ескерткіш тақта орнатып, мүжәлсіз және әлеуметтік қорғалушы топтарға қайырымдылық шаралар ұйымдастырылды. Ал, тәуелсіздік мерекесіне арналған ең негізгі салтанатты шаралар 13  желтоқсан күні, аудан орталығындағы «Ынтымақ» алаңында басталды.

          Мемлекеттік Ту  көтерілді

Аудан тұрғындары орталық алаңға жиналғаннан кейін Қазақстан Республикасының   денсаулық сақтау және әлеуметтік даму министрлігінің еңбек, әлеуметтік қорғау және көші қон Комитеті төрағасының орынбасары Оспанқұлов  Төлеген Қапақұлы,  Маңғыстау облысы әкімінің орынбасары Ілмұханбетова Шолпан Лазарқызы бастаған құрметті қонақтар және аудан басшылығы сахна төріне көтерілді. Аудандық жергілікті полиция басшысы Ж.Қалаубай  аудан әкіміне баянат бергеннен кейін, Әнұран орындалып, Қазақстан Республикасының Туын саптық үлгіде киінген екі ішкі істер қызметкері салтанатты түрде көтерді. Жүргізуші мерекелік шараны ашқан соң алғашқы болып, аудан әкімі құттықтау сөз сөйлеп, аудан жұртшылығы мен қонақтарды  тәуелсіздік мерекесімен құттықтады. Бұдан соң, жарқын болашаққа жаңа бір саты қадам басушы жасөспірімдерді Республикалық бірыңғай «Жасұлан» ұйымына қабылдау рәсімі өтіп,  балалар мен жасөспірімдер  ұйымының симболы болған, көк байрақ түстес  көгілдір галстукты ел ағалары мен құрметті қонақтар салтанатты табыстады. Қасиетті көк Туды көтеру рәсімін аяқтап, патриоттық әндер шебері Самат Құлманов орындаған «Атамекен» әні жиналған қауымның қостауымен Қарақия аспанын шаттыққа бөледі. Тәуелсіздігіміздің тұғыры нық, киелі Байрағымыз биік болса, бұдан асқан бақыт бар ма, «Елім!»- деп соққан әр жүрек үшін?!

Тәуелсіздік көгершіндерін ұшырды

Орталық алаңнан мәдениет үйі алыс емес. Ауылды көркейту бағдарламасы аясында атқарылған жұмыстармен таныса жүрген құрметті қонақтар мен аудан халқы  жан-жағы абаттандырылған аумақты аралап жаяу жүргіншге арналған соқпақ жолмен жаяу жүрді. Мәдениет үйі алдында сап түзеген жастар мен түрлі ұлт өкілдері тойшы қауымды салтанатпен қарсы алды.Тәуелсіздікке тәу етіп, түрлі шарлармен бірге бейбітшіліктің 25  ақ көгершінін ұшырды. Мәдениет үйінің фойесінде  аудан әкімі Ә.Дауылбаев бастаған қонақтар, аудан активі  қолөнер мен кітап  көрмесімен танысты. Облыс көлемінде өткен «Түп төркінін төрге оздырған Маңғыстау» атты этнографиялық фестиваліне біздің ауданымызда қатысып, жүлделі орын иеленгендердің көркем туындылары көрермен көңілінен шықты. Қонақжайлықтан алдына жан салмайтын қазекемнің салтымен «Сенек» ауылының тұрғыны А.Қожахметова шұбат ұсынып, ақ дәм ауыз тигізді.

Салтанатты жиында  саңлақтар марапатталды

Ұлық мерекеге арналған  салтанатты жиынға келген жұрт мәдениет үйінен асып артылды. Салтанатына сәні жарасқан  салихалы сахна төрінде жарық бергіш құралдарының көмегімен Тәуелсіздік монументінің бейнесі сәулеленген. Сахна жанында Елбасы жолы, айбынды Астана, жарқын жетістіктерді баяндаған  бейне-баян қойылған.

Ортаға шыққан сайдың тасындай жүргізушілердің әлқиссасынан кейін, бір сәтке  тыныштық орнап, Қазақстан Республикасының  Әнұраны ойналды. Алғашқы болып сахна төріне көтерілген  Қазақстан Республикасының  денсаулық сақтау және әлеуметтік даму министрлігінің еңбек, әлеуметтік қорғау және көші қон Комитеті төрағасының орынбасары Оспанқұлов   Төлеген Қапақұлы аудан жұртшылығын мемлекет атынан, өз атынан құттықтап, ел тәуелсіздігінен бергі 25 жылда жеткен жетістіктерде Қарақия ауданының қосқан үлесі ерекше екенін атаса, келесі сөз  Маңғыстау облысы әкімінің орынбасары Ілмұханбетова Шолпан Лазарқызына берілді.

Аудан халқын ұлық мерекемен құттықтаған Шолпан Лазарқызы:

Қарақия ауданы — Маңғыстау облысы бюджетінің «доноры» десек, артық айтқандық болмайды. Өйткені еліміз және облыс дәрежесіндегі ірі жобалар жүзеге асырылып, құрылыс нысандары көптеп салынуда. Өңірдің дамуына өз үлесін қосып отырған аудандарыңыз өркендеп, дами берсін! — деді, өз құттықтауында.

Сахнаға көтерілген республика өкілі және облыс басшылығы ауданымыздың экономика және әлеуметтік әр саласында жемісті еңбек етіп жүрген 25 азаматқа  «Қазақстан Республикасының Тәуелсіздігіне 25 жыл» мерекелік медалін тағып, марапаттады.

Бұдан соң аудан әкімі Ә.Дауылбаев құттықтау сөз сөйлеп, соңғы жылдары ауданымыздың қол жеткізген жетістіктеріне тоқталды. Осы орайда Әділбек Құлынтайұлы, Қазақстан Республикасының Президенті Нұрсұлтан Әбішұлы Назарбаевтың Жарлығымен, Құрық ауылының тұрғындары көп балалы аналар  Мерует Батыргалиқызына «Алтын алқа», ал Әйгерім Ерсайынқызына «Күміс алқа» атағы мен төсбелгісін табыс етті. Бұдан соң, Қарақия аудандық мәслихатының шешімімен, Қазақстан Республикасы Тәуелсіздігінің 25 жыл  мерейтойына орай және Қарақия ауданының әлеуметтік- экономикасына қосқан үлесі үшін ардагері, атақты мұнайшы – геолог Мұханбет Ідіркеновке,  Еңбек ардагері, мемлекеттік қайраткері, 2000-2002 жылдары Қарақия ауданының әкімі болған Нұрұлы Саламатқа, көп жылдары Қарақия ауданының автокөлік саласын басқарған, «Ойл Сервис Компани» жауапкершілігі шектеулі серіктестігі директорының орынбасары Бөкенбаев Ержігіт Әділбайұлына, 2002-2006  жылдары Қарақия ауданының әкімі қызметінде болған, «МАЭК» Қазатомөнеркәсіп» жауапкершілігі шектеулі серіктестігінің департамент басшысы Бисенов Бақыт Айдарханұлына «Қарақия ауданының Құрметті азаматы» атағы берілді.Бұдан соң ауданымыздың бір топ озат қызметкерлеріне аудан әкімдігінің «Құрмет грамотасы» мен алғыс хаттары тапсырылды. Ел тәуелсіздігінің 25 жылдық мерейлі мерекесіне арналған салтанатты жиынның соңы аудан өнерпаздары әсем ән, күмбірлі күйіне ұласты. Сонымен қатар ауданымыздан түлеп ұшып, бүгінде елімізге танымал болған «Самал» тобы туған халқына ән-шашуларын арнады. Тәуелсіздік мерекесі кезінде ұйымдастырылған іс-шаралар аясында автокөліктер шеруі де өтті. Ел тәуелсіздігін дәріптеген түрлі ұрандармен, жалаушалармен безендірілген автокөліктерде сақа жігіттеріміз желбірете көтерген көк Байрағымыз көрермен қауымның жүрегіне қуаныш ұялатып, елдігіміз бен егемендігімізді паш етті.

Шынар КЕНДІН

[gallery td_select_gallery_slide="slide" ids="16295,16306,16308"]