Қарақияда ескерткіш тақта орнатылды

©

Бүгін Қазақстан Республикасы тәуелсіздігінің 25 жылдық мерекесі қарсаңында танымал дәрігер Биманов Ибрагимнің есімін ел есінде мәңгі орнықтыру мақсатында өзі қызмет еткен аудандық орталық аурухана қабырғасына орнатылған сынтастың ашылу рәсімі  болды.

Кезінде ауданымыздың денсаулық саласына елеулі үлес қосқан азаматтың  құрметіне орнатылған сынтастың ашылу рәсіміне аудан әкімі мен оның орынбасарлары, бөлім, мекеме басшылары мен аудандық мәслихат хатшысы, депутаттар, ардагерлер кеңесінің төрағасы, аудан ардагерлері, облыстық денсаулық басқармасының өкілдері мен марқұмның отбасы, тумаластары, бірге жұмыс жасаған әріптестері мен достары қатысты. Жиын салтанатты түрде ашылғаннан кейін, алғашқы сөз кезегі аудан әкімі Ә.Дауылбаевқа берілді.Жиналған қауымды алда келе жатқан ұлық мерекемен және бүгінгі игі шараның ашылуымен құттықтаған аудан әкімі, аудан жетістіктері мен мерейлі тәуелсіздік мерекесі қарсаңында жүзеге асып жатқан жағымды жаңалықтарды атап айтты.

— Еліміз тәуелсіздігінің 25 жылдығы қарсаңында біз,өткенімізді түгендеп, тарихымызға тағлым жасап, кешегі өткен ата-бабаларымыздың ерен еңбегі мен ерліктерін еске алып, кейінгі ұрпаққа үлгі етуіміз керек. Міне, сол үрдістің жалғасы ретінде кеше ғана Құланды ауылында Маңғыстаудың білім саласына еңбегін сіңірген, бұл күнде арамызда жоқ, Қазданбай Қосжановтың өзі тұрып, өмір сүрген үйінің қабырғасына орнатылған ескерткіш тақтаны салтанатпен ашсақ, бүгін ауданымыздың денсаулық саласының майталманы болған Ибрагим Бимановтың ерлік еңбегін бүгінгі ұрпаққа өнеге етіп, ескерткіш тақтасын ашқалы отырмыз! - деп, жиналған қауымды құттықтаған аудан әкімі Ә.Дауылбаев және  марқұмның досы  Жаңабай Қибасовтар ескерткіш тақтаны ресми ашты.

Ескерткіш тақта қасиетті жұма күні ашылғанын жақсы ырымға балаған тумаластары ақтылы шашу шашса, аудандық мешіттің имамы Т. Хамит аты ардақталған марқұмның рухына арнап құран бағыштады.

Биманов Ибрагим 1933 жылы  наурыз айында Түркіменстан жерінде Қабыл ауыл советі, Сулмен жерінде дүниеге келген. Жастайынан зерек, білімге, жаңалыққа жаны құмар Биманов Ибрагим  мектеп қабырғасынан-ақ дәрігер болуды армандайды. Биманов Ибрагим  колхоз жерінде 7 сыныпқа дейін қазақша бітіріп, 10 жылдықты Кросноводск қаласындағы түркен мектебінде бітірген. Талабы таудай жас жігіт, мектеп бітірісімен Ашхабат мемлекеттік медицина институтын 1958 жылы ойдағыдай бітіріп, Красноводск қаласындағы туберкулез диспансерінде бас дәрігер болып жұмысқа кіріседі.

Дәрігер – күрделі де жауапты мамандық. Өмірін дәрігерлікке арнаған адамның бойында ең бастысы – «халқыма адал қызмет етсем» деген таза да адал ниеті болу керек. Жүрегі «елім, халқым» деп соққан табанды да, зейінді жас жігіттің еңбек жолы осылайша басталған еді,-деп еске алған жұрт оның өмір жолы, осы ауданда атқарған еңбек жолы мен адамгершілік қасиеттері туралы айтты. Ал отбасы мен тумаластары атынан марқұмның ұрпақтары әке рухына арнап ас-садақа беріп, кең дастархан жайыпты. Бұл басқосуға жиналған жұрт  Ибекең жайлы жақсы естеліктер айтып, аудан басшылығына алғыс білдірді. Слайд арқылы көрсетілген көне суреттер тізбегі – көңілдерге ой салып, кешегі өткен әкелерге, оларға деген бүгінгі ұрпақтың құрметін одан әрі арттыра түскендей болды. Өткені өнегеге толы, болашағын бақытқа бастаған қазыналы өлке – Қарақияның құтты топырағында әлі талай ардагердің есімі еленіп, атағы ардақталатын болады.Ең бастысы, еліміз аман, жұртымыз тыныш болсын, ағайын!

Шынар КЕНДІН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.