Кресло – арба таратылды

Қазақстан Республикасының заң­дылықта­рына сәйкес «мүгедектерді әлеуметтік қорғау» - оңалту саласындағы негізгі бағыттарының бірі болып саналады. Әлеуметтік оңалту тұрмыстық-әлеуметтік және қоғамдық-әлеу­мет­тік деп екіге жіктеледі. Тұрмыстық-әлеу­мет­тік оңалту мүгедектің қоршаған орта жағдай­ларына үйренуі. Яғни, өз қалауынша іс-әрекет жасау үшін көмекші құралдарды өздігінше қолдануы, тіршілік тынысының шектелуін жою. Сонымен қатар мүгедек жандар техни­калық көмекші және протезді-ортопедиялық құралдармен қам­тамасыз етіледі. Әсіресе, жүйке дертіне шалдыққан науқастар жүріп-тұру аппарат­тарына мұқтаж.

Заман ағымына сәйкес көмекші құралдар тізімі де ұлғайып келеді. Әзірленген жеке оңалту бағдарламасы мүгедек жандарды әртүрлі протездермен, есту аппа­ратымен,тифломагнитоламен, кресло-арбамен, жеке гигиеналық құралдармен, ымдау тілі маманымен және жеке көмек­шілік қызметімен қамтамасыз етіп келеді.

Қарақия ауданы көлемінде әр түрлі топта 1200-дей мүгедек бар. Кембағал және зағип жандарға мемлекеттік қолдау заңды мөлшерде көрсетіліп тұрады. Мәселен, әр атаулы мерекеде 5 АЕК көлемінде әлеуметтік ақшалай көмек беріледі. Сондай-ақ «Жеке оңалту бағдарламасы» аясында бөлінген заттарды тізім бойынша уақытылы таратып отыр.Бұл жолы ауданымыздың 13 мүгедегіне кресло-арба таратты. Мұнда Жетібайға – 4, Мұнайшыға – 4, Құрыққа – 2, Құландыға – 3 кресло- арбаны мүгедектердің өтініштеріне сәйкес алдырып, әрқайсысын мұқтаж жандарға табыс етті. Жүріп-тұруы қиындаған жандар көмек құралды болғанына қуанып, аудан басшылығына алғыстарын айтты.

Аршын КЕРЕЙ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.