«Назарбаев Зияткерлік мектептері» дербес білім беру ұйымының барлық интернет платформаларында ұстаздарға арналған «Ұлылықтың жолында ұстаз тұрар» атты жаңа жоба бастау алды. Жоба аясында мұғалімдер құрметіне арнап бейнероликтер жарияланды, - деп хабарлайды mangystaumedia.kz сайты.
Әрбір дана ұстаздың кеше дара шәкірт болғаны аян. Олардың бірқатары ардақты және мәртебелі мамандыққа деген таңдауларын бала күнінде жасап үлгерген. Осы ретте өмірлік ұстанымдармен жазылған фотосуреттер NIS мұғалімдерінің мамандықтары мен таңдаулары үйлесім тапқандығын дәлелдейді.
«Әділетті, шынайы, ашық-жарқын болу, өз мамандығына шын жүрекпен берілу – осының барлығы нағыз ұстаздың даналығын құрайды», - дейді Шымкент қаласындағы физика-математика бағытындағы мектептің модератор-мұғалімі Ақмарал Ермекбаева.
Ақтаудағы NIS-тің модератор-мұғалімі Лизаветта Хамитова кәсіби жетістік қол жеткізген нәтижелерге тоқтамаудан басталатынына сенімді.
Қостанай қаласындағы Назарбаев Зияткерлік мектебінің информатика пәнінің модератор-мұғалімі Александр Шерцер: «Егер сіз еңбекті сәтті таңдап, оған жаныңызды салсаңыз, бақыт сізді өзі іздеп табатынына зор сеніммен қарайды», - деп өз мамандығына деген сүйіспеншілігін жеткізе білген.
Ақтау қаласы NIS баспасөз қызметінің айтуынша, мұғалімдердің мұрағаттық фотосуреттері көпшілік қауымның қызығушылығын тудырды.
«Ұстаздар ата-аналарымен бірге ескі альбом беттерін парақтап, сүйікті оқиғаларын еске түсірді. Ұстаздарымызды уақыт өте келе сарғайған, кей тұстары бүлінген ақ-қара суреттері бақытты балалық шаққа сапар шеккізді», - дейді Ақтау қаласы NIS баспасөз қызметі.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
