​​​​​​​Шетпенің 13 көшесіне асфальт төселеді

Биыл Маңғыстау ауданының орталығы Шетпе ауылындағы 13 көшеге асфальт төселеді. Жалпы ұзындығы 10,5 шақырым жолды төсеу жұмыстары «Жұмыспен қамтудың жол картасы 2020» бағдарламасы аясында жүзеге асырылмақ. Бұл туралы аудан әкімі Тілек Көшмағанбетов мәлімдеді, - деп хабарлайды mangystaumedia.kz сайты.

Оның айтуынша, қазіргі таңда Шетпе ауылы бойынша Ащыбұлақ – 2, Жаңа Орпа – 1, Шетпе – 1 және Қызылтұран шағынаудандарының көшелеріне асфальт жабыны төселді. Жөндеу жұмыстары тамыз айының соңына дейін аяқталады деп жоспарланып отыр. Мердігер мекеме – «Абат» ЖШС.

«Жалпы аудан көлемінде жол жөндеу жұмыстары қарқынды жүріп жатыр. Атап айтқанда Шетпе-Қызан автокөлік жолының 12,988 шақырымына (арпалы жері) көпір салу жұмыстарын осы жылдың аяғына дейін аяқтап, көпір құрылысын пайдалануға беруді жоспарланып отыр. Сондай-ақ Сайөтес ауылының Толыбай шағынауданының селоішілік жолдарын салу жұмысы да осы жылдың соңына дейін аяқталады. Ауылішілік жолдың жалпы ұзындығы – 5,6 шақырым. Құрылысты жүргізуші «Ақжолқұрылыс» ЖШС. Сайөтес ауылы темір жол арқылы өтетін көпір құрылысын салу үшін мердігер мен тапсырыс беруші арасында келісімшарт жасақталып жатыр. Осы жылдың тамыз айында құрылыс жұмыстары басталса, 7 ай көлемінде аяқталады деп жоспарланған»,- деді аудан әкімі.

Сонымен қатар ​Шетпе-Қызан автокөлік жолын қайта құрылымдау (Тасмұрын-Мәстек аралығы) жұмысы барысында 36 шақырым аудандық дәрежедегі автокөлік жолының 20 шақырымына асфальт жабыны төселіп, пайдалануға берілді. Жыл соңына дейін қалған 16 шақырымы пайдалануға беріледі деп жоспарланып отыр.

Осы жолды Қызанға дейін жеткізу мақсатында «Шетпе-Қызан» автокөлік жолын қайта құрылымдау үшін жолдың 85-110 шақырымын жөндеу жұмысына жобалық сметалық құжат жасалып жатыр. Жобалаушы - «Каздорпроект» ЖШС. Қазіргі таңда жоба мемлекеттік сараптама қарауына тапсырылды. 2020 жылдың соңына дейін құрылысына өтінім беріледі.

«5,6 шақырымды құрайтын Шебір ауылішілік автокөлік жолы құрылысын аяқтауға қаржы толықтай бөлінбеуіне байланысты жоба өтпелі болды. Яғни 2020 жылы Шебір ауылішілік 1 шақырым автокөлік жолының құрылысын жүргізу жоспарлануда, 4,6 шақырым қалған автокөлік жолының құрылысын қаражат бөлінісіне қарай келесі жылы жүргізілетін болады», - деді ол.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.