Түркия Республикасының Ақтаудағы Бас консулдығы қайырымдылыққа атсалысты

Рамазан айында Түркия Республикасының Ақтау қаласындағы Бас консулдығы қайырымдылық шарасын ұйымдастырып, аймақтағы мұқтаж отбасыларға азық-түлік қорабын табыстады, - деп хабарлайды mangystaumedia.kz сайты.

Сонымен қатар Түркия Республикасының Ақтау қаласындағы Бас консулы Мұзаффер Ақйылдырым Рамазан айымен тұрғындарды құттықтап, игі шараға атсалысқан азаматтарға өз алғысын айтты.

«Covid-19 індетіне байланысты шектеулі кезеңде өтіп жатқан қасиетті Рамазан айы Қазақстан мен Түркия халқына даму, құт-береке және тыныштық әкелуін тілеймін. Әлемдік деңгейде адамзатқа, халықтың денсаулығы мен экономикасына қауіп төндірген Covid-19 індеті кезінде бір-бірімізге рухани және материалдық көмек бере отырып, бұдан да жақын болуымыз, әлеуметтік жауапкершілікпен көмек қолын созуымыздың мәні зор. Осы ретте «ҚЗИ Банкі» Ақтау филиалының директоры Нұрлан Оңғарбек, Маңғыстау облыстық «Бекет ата» мешітінің имамы Еркеғали мырзалармен бірге Рамазан айының сыйлығын мұқтаж отбасыларға тапсырғанымызға қуаныштымын. Осындай татулық пен ынтымақтастықты арттыратын үлгілі істер өз жалғасын таба берсін», - деді Мұзаффер Ақйылдырым.

Сондай-ақ ол: «Дос әрі бауырлас екі елдің экономикалық, әлеуметтік және сауда-саттық салаларында ынтымақтастықтың, бірліктің нығаюын және Рамазан айының құт пен береке әкелуін шын көңілден тілеймін», - деп өз сөзін жалғады.

Жұлдызай ҚАЛИЕВА

Суреттерді түсірген Серік МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.