Ақтауда үлескерлерді алдап, пәтерсіз қалдырған «Тастемир ЛТД» ЖШС басшысы қамауға алынды, - деп хабарлайды mangystaumedia.kz сайты Ақтау қаласы әкімдігінің баспасөз қызметіне сілтеме жасап.
Қазіргі таңда Маңғыстау облысының Полиция департаменті «Гаухартас» тұрғын үй кешені тұрғындарының өтініші бойынша ҚР Қылмыстық кодексінің 190-бабы 4-бөлігінің 2-тармағына сәйкес сотқа дейінгі тергеу жұмыстарын бастап кетті.
«Күдікті ретінде «Тастемир ЛТД» ЖШС басшысы ұсталып, уақытша ұстау изоляторына қамалды. Іс бойынша тергеу-жедел іс-шаралары жүргізіліп жатыр, - дейді Ақтау қаласы әкімдігінің баспасөз қызметі.
Еске сала кетейік, бұған дейін қалада салынып жатқан заңсыз құрылыс нысандарға мониторинг жүргізілді. Соның ішінде «Гаухартас» және «Махаббат» кешендері жобаға сәйкес келмейтіні анықталды. Алайда тұрғындар құжаты рәсімделмеген тұрғын үйлерге қаржы төлеп, алданып қалғандары жайлы да айтылған болатын.
Айта кетейік, Ақтауда тұрғын үй құрылысын жүргізіп жатқан тұлғалардың (жеке немесе заңды), үлескерлер қаражатын тартуға рұқсат құжаты жоқ.
ҚР-ның «Тұрғын үй құрылысына үлестік қатысу туралы» заңына сәйкес, үлескерлердің қаражаты есебінен тұрғын үй құрылысын жүзеге асыруға ниет білдіруші тұлғалар жергілікті атқарушы орган тарапынан берілетін рұқсат құжаттарын рәсімдемеген.
Суретті түсірген Талант ҚҰСАЙЫН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
