Маңғыстауда жағаға шыға алмаған 7 адам құтқарылды

«Металлист Р» ЖШС қызметкерлері теңіз жағалау бетінің мұздануына байланысты 3 күн бойы жағаға шыға алмаған. Оларды Маңғыстау облысы ТЖД және ҚР Қорғаныс министрлігінің әскери қызметшілері құтқарды, - деп хабарлайды mangystaumedia.kz сайты.

Зардап шеккендерді құтқаруға ҚР Қорғаныс Министрлігі Ақтау қаласындағы ұшу құрамының 5 әскери қызметшісі бар Ми-8 әуе кемесі жұмылдырылды. Сонымен қатар 6 құтқарушы, 1 бірлік техника және 2 жүзу құралы бар Маңғыстау облысы ТЖД күштері мен құралдары жіберілді.

«29 қараша күні шамамен 19:00-де әскери және құтқарушылардың жоғары кәсіпқойлығының нәтижесінде 7 адам қауіпсіз жағалауға жеткізілді. Зардап шеккендердің барлығына алғашқы медициналық көмек көрсетілді. Жылы киім және азық-түлікпен қамтамасыз етілді», - дейді Маңғыстау облысы ТЖД баспасөз қызметі.

Еске сала кетейік, 26 қараша күні «Металлист Р» ЖШС-ның 7 қызметкері «Байда» моторлы қайығымен теңізге шықты. Олар «Нехти» кемесін кәдеге жарату жұмыстарын жүргізу үшін жағалаудан 11 км қашықтықтағы «Арман БК» ЖШС кен орнына барған болатын.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.