Бұл туралы қоғамдық коммуникация орталығында өткен брифингте МО дін істері басқармасының басшысы Мақсатбек Маханбетов мәлімдеді, - деп хабарлайды mangystaumedia.kz сайты.
«Өздеріңізге мәлім, Қазақстан мұсылмандары діни басқармасының төрағасы, Бас мүфти Наурызбайқажы Тағанұлы Қазақстандағы барша мұсылман қауымға үндеу жасап, 2020 жылғы 18 мамырдан бастап елдегі мешіттердің ашылатыны туралы хабарлады. Алайда бұл рұқсат етілген шаралар тек төтенше жағдаймен қатар, карантин тәртібі де алынған өңірлерге байланысты екенін назарларыңызға салғым келеді», - деді Мақсатбек Маханбетов.
Қазақстан Республикасында төтенше жағдай режимі алынғанымен, кейбір аймақтарда эпидемиологиялық жағдай әлі де тұрақты емес, оның ішінде Маңғыстау облысында дерттің таралуы бәсеңдемей отыр. Сол себепті облыста карантин тәртібі 25 мамырға дейін созылды.
Сондықтан өңірдегі эпидемиологиялық жағдайды ескере отырып, Маңғыстау облысында топ болып құлшылық ететін орындарды (мешіттер, шіркеулер) ашуға әлі ерте.
«Өкінішке қарай, биыл 25 мамырға дейін облыстың барлық мешіттерінде ораза айт намазы, жұма намазы және тарауиқ намазы оқылмайды. Қасиетті рамазан айында келетін Қадір түнінде мешіт жабық болуына байланысты имамдар биыл әлеуметтік желілерде тікелей эфирде өздерінің үгіт-насихат жұмыстарын жүргізіп, уағыздарын айтатын болады», - деді Ақтау қалалық Бекет Ата мешітінің бас имамы Қайрат Маманбаев.
Егер жағдай тұрақталса, 2020 жылдың 25 мамырынан бастап облыстағы барлық құлшылық ететін орындар (мешіттер, шіркеулер) арнайы санитарлық талаптарды сақтай отырып ашылатын болады.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
