2006 жылдың шілде айында қазіргі аумақтың тұрғындары бала-шағаларын ертіп, ереуілдеп облыстық әкімшіліктің алдына жиналып, өздеріне Ақтау қаласы маңынан үй салуға жер сұрады. Облыс әкімінің орынбасары қызметінде жүрген кезім еді, комиссия құрып алып, сол мәселені шешу бағытында жұмыс жүргіздік. Нәтижесінде, автодром, «Маңғыстау»-2,3,4,5, «Қызылтөбе»-2, «Баянды»-2 деген жерлерден 7 мыңның үстінде жер участкесін тиісті заңдылықтар негізінде бөліп, кезекте тұрған азаматтарды 100 пайыз қамтыдық. Келесі жылы соның негізінде Мұнайлы ауданы құрылды.
Тәуелсіздіктен кейінгі елімізде алғашқы құрылған осы ауданды Оспан Қазақбаев деген әкім басқарғаны ел есінде болар. Жаңа ауданның құрылуы, ең алдымен ауданның ішкі, мәдени, әлеуметтік жағдайын да, қордаланып қалған мәселелерді де оңды шешуге ықпал етті. Әрі Ақтау қаласының шын мәніндегі облыс орталығы болып қарқынды дамуына да игі әсерін тигізді. Жаңа құрылған ауданның аяғынан қаз тұрып кетуіндегі ОспанҚазақбаевтың еңбегі ұшантеңіз екендігін де көзіқарақты жұртшылық жақсы біледі.
Суретті түсірген Т.Құсайын
Бұдан кейін, Ақтау қаласына әкім болған азғантай уақыт ішінде Қазақбаев қаланың күнделікті және ағымдағы тіршілік мәселелерімен айналыса отырып, бүгінде қарыштап өсіп жатқан жаңа шағынаудандардың бас жоспарын жасауды тиянақтап, оларға жүргізілетін комунальдық жүйелерді тартудың оңтайлы схемаларын жасақтап бекіттірді. Нәтижесінде, қарыштап өсіп жатқан қала құрылысын тамашалап отырмыз және бұл кезінде келемешке айналған қиялы «Ақтау Сити» еместігін де ел біледі.
Суретте С. Керелбаев Сурет авторы Т.Құсайын
Өзім білетін Оспан Дәденұлы - салауатты да парасатты, бірсөзді азамат. Кешегі жекешелендіру кезеңінде бүкіл Ақтау қаласының негізгі құрылыстарын жүргізген құрылыс индустриясын және өңіріміздегі құрылыс мамандарын сақтап қалудағы еңбегін жоғары бағалаймын. Мүмкін, оның құрылысшы болуының да бұған әсері болған шығар. Бір сөзбен айтқанда, Оспан Қазақбаев азамат ретінде өз позициясын қай кезде де, қай жерде де жоғары ұстайды, салиқалы саясатшы ретінде қасиетті Маңғыстауымыздың лайықты өкілі болады деп сенемін.
Сақып КЕРЕЛБАЕВ,
Маңғыстау облысының құрметті азаматы, қоғам қайраткері
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
