Ақтау әуежайы 16 мамырдан бастап өз жұмысын жалғастырады

Бұл туралы бүгін Маңғыстау облысының қоғамдық коммуникация орталығында өткен брифингте Ақтау халықаралық әуежайының директоры Ерғазы Жолдасов мәлімдеді, - деп хабарлайды mangystaumedia.kz сайты.

Мемлекеттік комиссияның шешімі бойынша Ақтау әуежайы 16 мамырдан бастап ішкі әуе рейстерді қабылдайды.

«Air Astana» әуе компаниясы бұрынғы ұшу кестесі бойынша «Ақтау – Нұр-Сұлтан» және «Ақтау – Алматы» бағыты бойынша күніне бір рет жолаушыларды тасымалдайды. Ал «Sckat» әуе компаниясы «Ақтау – Алматы» бағыты бойынша күн сайын бір рет, ал «Ақтау – Шымкент» бағыты бойынша аптасына екі рет жолаушыларды тасымалдайды. Елдің барлық қалаларына ұшатын рейстер іске қосылады.

Тек қана Атыраудағы пандемиялық жағдайға байланысты «Ақтау – Атырау» рейсі әзірге ұшпайды. Сонымен қатар шет мемлекеттерге бағытталған әуе рейстерінің қашан іске қосылатыны да әзірге белгісіз.

Рейстер әуежай алгоритміне, күшейтілген санитарлық нормаларға, сондай-ақ борттағы қауіпсіздік ережелеріне сәйкес орындалады.

Қауіпсіздік ережелері:

1. Арақашықтық сақтау. Тіркеу, тексеру, отыру мен түсу кезінде жолаушылардың (1 метр) арақашықтық сақтауы қажет.

2. Термометрмен өлшеу. Терминалға кіргенде жолаушылардың дене қызуы тексеріледі.

3. Жеке қорғаныш құралдарын пайдалану. Ұшаққа отырғанға дейін және ұшу кезінде жолаушылардың бетпердесі болуы тиіс.

4. Жолаушылар ұшудан 2 сағат бұрын әуежайда болуы қажет.

5. Шығарып салушылар және күтіп алушы адамдар терминал ғимаратына кіре алмайды.

Әуе рейстері туралы толық ақпаратты әуе компанияларына хабарласып біле аласыздар.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.