Маңғыстаулық каратистер әлем чемпионатынан қола жүлде алды

Чилидің Сантьяго қаласында жастар және жасөспірімдер арасында өткен каратэден әлем чемпионатында маңғыстаулық спортшылар қола жүлдені иеленді. Бүгін Маңғыстау облысы әкімінің орынбасары Қ.Жұмашев спортшыларды қабылдап, сый-сияпат көрсетті, - деп хабарлайды mangystaumedia.kz сайты. Әлем чемпионаты 23 – 27 қазан аралығында өткен. Додаға 96 елден келген 1500 спортшы қатысса, төртеуі Маңғыстау өңірінен барған. Алғашқы жүлдені Рауан Амантайұлы жеңіп алды. Ол «ката» санаты бойынша сынға түсіп, жүлделі үшінші орынды қанжығасына байлады. Бұл – қазақ каратесі тарихындағы алғашқы жүлде. Ал Дәулет ауылдық округінен шыққан Айдос Мұхатов 63 келі салмақта соққыласты. Нәтижесінде қола медальге қол жеткізді. Сонымен қатар Еркінбек Байтөреев 21 жасқа дейінгі жастар арасында үздік үштіктен көрінді. Бұған дейін ол 2017 жылы Испанияда өткен әлем чемпионатында ел туын көкке көтерген болатын. «Сантьяго қаласында өткен каратэден әлем чемпионатына 1000-нан аса мықты спортшы келді. Біз жеңіс тұғырынан көріну үшін барымызды салдық. Алтын аламыз деген үмітпен барған едік, алайда бағымызға орай қола жүлде бұйырған екен. Бұл – біз үшін үлкен жетістік. Осы жетістікке жетуіміз жаттықтырушыларымыздың еңбегі мен қолдауының арқасында келді. Алдағы уақытта жеңіс тұғырынан биік көрінуіміз үшін үздіксіз жаттығып, дайындығымызды күшейтеміз», - дейді қола жүлде иегері Еркінбек Байтөреев. Маңғыстау облысы әкімдігі тарапынан спорт саңлақтарына құрмет көрсетіліп, ақшалай сыйлықтар табысталды.   «Маңғыстау облысы спорт саласында көптеген жетістікке жетуде. Бокс, дзюдо, самбо, джиу-джитсу, енді міне каратэден алған жүлде өңір мерейін үстем етуде.  Бұл дегеніміз қажырлы еңбекпен келген жеңіс. Спортшыларға сәттілік серік болсын. Алдағы жарыстарда алтын жүлдені қанжығаға байлайтынына сенімдімін. Бапкерлерге алғыс айтамын», - деді Маңғыстау облысы әкімінің орынбасары Қаныбек Жұмашев. Маңғыстау облысы бойынша каратэден аға бапкер Ержан Қожаевтың айтуынша, Испанияда ересектер арасында «Madrid Open» турнирі өтеді. Сол турнирге қатысу жоспарда бар, қазір дайындық жұмыстары жүргізілуде. «Желтоқсанның 14 – 15 аралығында каратэден Орталық Азия чемпионаты басталады. Сонымен қатар лицензиялық турнирлерге қатысу үшін дайындаламыз», - дейді ол.

Жұлдызай ҚАЛИЕВА

Суреттерді түсірген ТАЛАНТ ҚҰСАЙЫН

[gallery td_select_gallery_slide="slide" ids="86945,86946,86951,86952,86947"]