Мұнайлыда айтулы күнге орай каратэ-додан жарыс өтті

Маңғыстау ауылының балалар мен жасөспірімдер спорт мектебінің залында Кеңес әскерлерінің Ауғанстаннан шығарылғанына 30 жыл толуына орай каратэ-додан 8-11 жастағы ұлдар арасында аудандық ашық біріншілік өтті. Шараға Ауған соғысының ардагерлері, каратэ спортының мамандары мен жанкүйерлері, ауыл тұрғындары қатысты. Жарыста Ақтау қаласының «Маңғыстау Арена», «Волна» спорт мектептерінен, Маңғыстау, Баянды ауылдары мен Атамекен, Дәулет ауылдық округтерінен жалпы саны 170-тей жасөспірімдер бақ сынасты. Жарыс 8-9 жастағы ұлдар арасында 5 салмақ дәрежесінде, ал 10-11 жастағы ұлдар арасында да 5 салмақ дәрежесінде өтті. Шара қорытындысы бойынша 8-9 жастағы ұлдар арасындағы  5 салмақ дәрежесі бойынша 20 қатысушы жүлделі орындармен марапатталды. Ал 10-11 жастағы жасөспірім ұлдар арасында да 5 салмақ дәрежесі бойынша 19 спортшы үздіктер қатарынан көрінді. Сонымен бірге «Үздік спортшы» аталымын Нұржаһұт Жайшылық пен Әділбек Аманжолов иеленді. «Жақсы техникасы үшін» Чингиз Серимов марапатталса, «Жеңіске деген жігерлігі үшін» аталымын Бейбарыс Қыдырсиық жеңіп алды. Спортшылардың арасындағы достық пен татулықты нығайтып, жастарға патриоттық тәрбие беру, жасөспірімдерді жүйелі түрде спортпен айналысуға тарту мақсатындағы шаралар легі Шоғы Мұңалұлы атындағы №5 орта мектепте жалғасын тапты. Кеңес әскерлерінің Ауғанстаннан шығарылуының 30 жылдығына орай 2002-2004 жылы туылған жасөспірім ұлдар арасында қол добынан (гандбол) ашық біріншілігі өтті. Жарысқа Басқұдық БЖСМ, Қызылтөбе лицейі және №3, 6, 9, 10, 13, 14 орта мектептерінің командаларынан, жалпы саны 80 спортшы қатысты. Ойын тартысты әрі қызықты өтті. Жүлделі I орынды Басқұдық БЖСМ командасы қанжығаларына байлады. II орынды Қызылтөбе лицейінің еншісінде болса, III орынмен №9 орта мектептің командасы марапатталды. Жарыста «Үздік ойыншы» аталымын Жангелді Жайылхан,  «Үздік шабуылшы» аталымын Абзал Павиз, «Үздік қорғаушы» аталымын Асылбек Жұмамұрат, «Үздік қақпашы» аталымын Ғани Оразбеков иеленді. Барлық жеңімпаздар арнайы дипломдармен және медальдармен марапатталды. Осындай іс-шаралар легі ауданымызда бірінен соң бірі жалғасты. Қанды соғыстың аяқталғанына 30 жыл толып отыр. Сол қиын-қыстау күндер еске түссе, жүрек сыздап қоя береді. Енді сол қиын сәттер ел басына түспесін, еліміз тыныш, жұртымыз аман болсын. Ауған соғысының ардагерлері бүгінгі жастарымызды отаншылдық сезімге тәрбиелеп, ақыл-кеңестерін беріп, жарқын өмірдің жарқыраған істеріне куә болып, арамызда жүре бергей!

Нұргүл АЛЯСОВА