"Бауырлас жауынгерлер" Ақтауда волейболдан ашық турнир өткізді

Биыл Кеңес әскерлерінің Ауғанстаннан шығарылғанына 30 жыл толады. 10 жылға созылған бұл соғыс тоқтап, жап-жас жауынгерлердің өз отанына аман оралуы бүкіл елді қуанышқа кенелткен еді. Осынау айтулы күнді лайықты атап өтуге кіріскен Ақтау қалалық ауған соғысы ардагерлері «Бауырлас жауынгерлер» қоғамдық бірлестігі ақпан айының басында Ауған соғысы ардагерлері арасында волейболдан жарыс өткізіп, оған Ауған соғысы ардагерлері ұйымдары қауымдастығының төрағасы Бақытбек Смағұлов қатысып, әрі ардагер, әрі спортшы ретінде сөйлеген жалынды сөздерімен ойыншыларға дем берді. Ойын тартысты болып, сәтті аяқталды. Жақында «Бауырлас жауынгерлер» облыс орталығындағы «Маңғыстау Арена» спорт кешенінде волейболдан әйелдер арасында ашық турнир ұйымдастырды. «Маңғыстау-Арена» спорт кешенінде өткен жарысқа өңіріміздің аудан-қалаларынан 12 команда қатысты. Олар — «Бейнеу», «Мұнайлы», «Каспий», «Қарақия», «Өзен Колледж», «Қызылсай», «Аршат», «МАЭК», «Волна», «Жастар», «Батыс», «АГП-1» командалары. Жанкүйерлердің делебесін қоздырып, қызықты өткен ойын қорытындысы бойынша үш команда жүлделі орындарға шықты. Атап айтсақ, 1-орын Ақтау және облыс мұғалімдерінен құралған «Аршат» командасына бұйырса, Қызылтөбе ауылындағы №2 орта мектептің 7-10-сыныптар оқушыларының «Мұнайлы»  командасы мен Жаңаөзен қаласындағы педагогикалық және көп салалы технологиялар колледжі студенттерінің «Каспий»  командасы 2 және 3-орындарды бөлісті. - Ауғанстан – жүректегі жазылмас жара, - деді Ақтау қалалық ауған соғысы ардагерлері «Бауырлас жауынгерлер» қоғамдық бірлестігінің төрағасы Мәтжан Шаулиев. - Ал біздің 30 жылдық құрметіне түрлі шаралар өткізіп жатқандағы көздеген мақсатымыз біреу-ақ. Ол — өскелең ұрпаққа өз Отанына шексіз берілген патриоттық рухы жоғары, қайсар да жауынгер ағаларын үлгі етіп, жастарды батырлар есімдерін қастерлеуге тəрбиелеу.

  Валентина ҚОЗЫБАҚОВА