Бекзат Нұрдәулетов Токио қаласына жолға шықты

Бүгін бокстан Қазақстан құрамасы Токио қаласына жолға шықты, - деп хабарлайды mangystaumedia.kz сайты.

Бұған дейін боксшылар «Ақбұлақ» олимпиадалық базасында Олимпиада қарсаңындағы оқу-жаттығу жиынын өткізді. Бас бапкер Ғалымбек Кенжебаевтың Olympic.kz сайтына берген сұхбатында жаттығу екі кезең бойынша жүргізілгені айтылды. Яғни, алдымен жалпы дене жаттығуына көңіл бөлсе, екінші кезеңде техниканы жетілдірген.

«Еліміздегі үздік боксшылармен спаррингтік кездесулер ұйымдастырдық. Мұның барлығы Олимпиадада жекпе-жектер кезінде спортшыларымызға көмек болары анық. Арнайы физикалық жұмыстар өткізгенімізді де айта кету керек», - дейді бас бапкер Ғ. Кенжебаев.

Еске сала кетейік, Токиода өтетін жазғы Олимпиада ойыны 23 шілдеден бастап 8 тамызға дейін жалғасады. Ал былғары қолғап шеберлері арасындағы бәсеке 24 шілде күні басталады.

«Біз бір апта бұрын ұшып барамыз. Жеті күн бойы өзге елдің табиғат жағдайына бейімделіп, карантин талаптарын сақтаймыз. Ұлттық құраманың екінші және үшінші нөмірлі боксшылары спаррингтік кездесуге келіп, бас команда жігіттерін шығарып салды. Баршаңызға көп рахмет! Жігіттердің спорттық бабы жоғары. Енді мінез көрсетіп, моральдық тұрғыдан мықты болу керек», - дейді Ғалымбек Кенжебаев.

Қазақстан олимпиадалық командасының сапында 97 лицензия жеңіп алған 96 спортшы бар. Олар байрақты бәсекеде 27 спорт түрінен бақ сынайды. Олимпиада ойындарының ашылу салтанаты 23 шілде күні Нұр-Сұлтан уақытымен 17:00-де Токио стадионында өтеді.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.