Азия кубогы: Маңғыстаулық дзюдошылар 4 қола, 1 күміс жүлде алды

Алматы қаласында өткен жастар мен жасөспірімдер арасында дзюдодан Азия кубогы аяқталды. Байрақты бәсекеде маңғыстаулық спортшылар 4 қола, 1 күміс жүлдемен оралды, - деп хабарлайды mangystaumedia.kz сайты.

Атап айтқанда 55 келі Қуанышбек Көмеков, 60 келі Дәулет Бисенқұлы, 66 келі салмақ бойынша Әділ Марлен және +100 келі салмақ дәрежесінде сынға түскен Мұхаммед Зұлхарнаев қола жүлдені қанжығаға байлады. Ал 60 келі салмақ дәрежесінде белдескен Әділет Жолекешов күміс жүлде алды.

"Жас батыр" спорт мектебінің директоры Манарбек Бисекеновтың айтуынша, Қуанышбек Көмеков алғашқы белдесуде Өзбекстан елінің дзюдошысы Юсув Тошмурадовпен кездесті. Таза әдіспен жеңіске жеткен Қуанышбек кейін Қырғызстаннан келген және қазақстандық спортшылармен күресті. Ал үшінші орынға таласу үшін өзбекстандық балуанмен кездесіп, жеңіске жетті.

Сондай-ақ Мұхаммед Зұлхарнаев ақтық сынға жолдама алу үшін Өзбекстан елінің балуанымен кездесті. Бұл кездесу маңғыстаулық Мұхаммед үшін сәтсіз болды. Десе де үшінші орын үшін белдесуде қырғызстандық дзюдошы Симбек Жапаровты басып озды.

"Дзюдошыларымыздың аяқ алысы жаман емес, бұйырса болашақта әлемдік аренада алтыннан алқа тағамыз", - дейді "Жас батыр" спорт мектебінің бапкері Жомарт Қобланов.

Еске сала кетейік, дзюдодан Азия кубогы 13-16 мамыр күндері Алматы қаласында өтті. Оған Өзбекстан,Тәжікстан,Қырғызстан мемлекеттері және ел ішінен келген 426 спортшы қатысты.

Жұлдызай ҚАЛИЕВА

Суреттер фейсбуктен алынды

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.