Маңғыстау облысының әкімі Есенғали Раушановты қабылдады

©

Облыс әкімі Ералы Тоғжанов ақын, Мемлекеттік сыйлықтың лауреаты Есенғали Раушановты қабылдап, 60 жас мерейтойымен құттықтады. Аймақ басшысы кездесуге қатысқан белгілі зиялы қауым өкілдерімен рухани әңгіме өрбітіп, сый-құрмет көрсетті. – Қадірлі қонақтар! Киелі Маңғыстау өңіріне қош келдіңіздер! Бүгінгі халықтың, елдің тойы құтты болсын! Әбіш ағамыздың, Фариза апамыздың ізбасары Есенғали Раушанов қазақ әдебиетінің қоржынына мол мұра салды. Бұл той Астанада Маңғыстаудың мәдениет күндері аясында басталған болатын. Сол кезде Маңғыстауда кеш өткізу туралы ел азаматтары бастама көтергенде сіз де, халық та қолдадыңыздар. Бұл дүбірлі тойға Ақтөбе, Атырау, Батыс Қазақстан облыстары дайындық үстінде, – деді облыс әкімі Ералы Лұқпанұлы. Қазақстанның еңбек сіңірген қайраткері, жазушы, драматург Әнес Сарай классик ақын 60 жасқа шығармашылық жетістіктермен келгенін айтып, шыққан тұғырынан таймауды тіледі. Маңғыстауда жасалып жатқан жұмыстарға оң бағасын беріп, халық жазушы Әбіш Кекілбаев атындағы орталықтың салынатынына ризашылық білдірді. – Рухани бауырымды мерейлі мерекесімен құттықтаймын! Ұлтымыздың бойындағы жақсы қасиеттер әр өңірде әртүрлі сақталған. Белгілі тұлғаларды қадірлеу,олардың шығармашылығын ұрпаққа үлгі етуде Маңғыстаудың орны ерекше. «Алуан-алуан жүйрік бар, әліне қарай шабады» демекші ақын көп, әрқайсысының өз орны, өз жолы бар. Үлкен тұлғалар ағысқа қарай жүзеді. Елдің мүддесіне сай әрекет еткен ақын халықтың руханиятының дамуына септігін тигізеді. Есенғалидың тойы – халықтың тойы. Ендеше оның шығармашылық кеші еліміздің қай өлкесінде өтсе де артық емес. Жақсыны таныған жақсы азаматтар, аман болыңыздар!, – деді жазушы, қоғам қайраткері Төлен Әбдікұлы. Кездесуде Қазақстанның еңбек сіңірген қайраткері Сауытбек Әбдірахманов Есенғали ақынның өмір жолын Қазақ елінің тарихындағы елеулі оқиғалармен сабақтастырып, «Қазақ поэзиясында өзіндік қолтаңбасы бар қаламгердің ерен еңбегі жалғаса берсін» деген тілегін жеткізді. – Қадірлі бауырлар! Құрмет пен лебіздеріңізге рахмет! Уақыт өтіп жатыр. Осыдан 10 жыл бұрын 50 жас мерейтойымда Ақтауға келгенде Әбіш ағам пен Фариза апам алып келген еді. Кеше Маңғыстауға келгенімде олардың жоқтығы жаныма батып, толқыдым. Олардың әруағы мені қолдап жүреді. Ералы Лұқпанұлының қолдауымен Әбіш ағаның 25 томдық кітабын қайта шығаруды қолға алдық. Кеше жастармен әсерлі кездесу өтті. Кеш өткізіп, зиялы қауым өкілдеріне құрмет көрсетуіңіз Елбасы Н.Назарбаев ұсынған рухани жаңғыру, Мәңгілік ел идеясының аясына топтасу жолындағы ізденістеріңіз деп білемін, – деді ақын Есенғали Раушанов. Кездесу барысында облыс әкімі зиялы қауым өкілдеріне шапан жауып, сый-құрмет білдірді.

Фарида МҰҢАЛҚЫЗЫ Суретті түсірген Серік МАЙЕМЕРОВ

[gallery td_select_gallery_slide="slide" ids="39740,39743,39742,39741,39739,39738"]