Биыл ҚР мемлекет және қоғам қайраткері Нәсіпқали Марабаевтың туғанына – 80 жыл. Атаулы күнге орай, №7-мектеп-лицейінде қазақтың біртуар тұлғасына арналған салтанатты шара өтті. Еске алу кешіне Маңғыстау облысы әкімінің орынбасары Мақсат Сқақов, облыс және қала әкімдігі өкілдері және Нәсіпқали Марабаевтың отбасы қатысты.
Нәсіпқали Марабаев – Батыс Қазақстан өңірлеріндегі мұнай байлығы өндірісінің негізін қалаған азамат. Ол 10 жылдан аса уақыт бойы Өзенде бұрғылау жұмыстары басқармасын басқарды.
- Нәсіпқали ағамыздың бастамасымен 4000 ұңғыма (шамамен 4 миллион метр) бұрғыланды. Мұны еңбектің жеткен шыңы деп атауға болар еді. Ол аянбай еңбек еткенінің арқасында түмен мұнайшыларын да басып озды, - деді Мақсат Сқақов.
- Бұл күнгі мереке республикалық деңгейде аталып өтетіндіктен, еліміздің түкпір-түкпірінен қадірлі қонақтар келді. Мектеп оқушылары мерекеге тыңғылықты дайындалды. Сондай-ақ, біз Нәсіпқали Марабаевтың өмірі жайында жазылған үздік шығармаға байқау жарияладық. Ең үздік туындылар мерекеде оқылатын болады, - деді Нәсіпқали Марабаев атындағы №7-мектеп-лицейінің директоры Қажет Бекжанова.
Нәсіпқали Марабаевтың ескерткішіне гүл шоғын қойған қонақтар мұражайды аралады. Бұл мұражай қоғам қайраткерінің еңбек жолы мен ерлікке толы өмірі сипатталған суреттер, марапаттар және медальмен толтырылған. Мұражай 2008 жылы 20 желтоқсанда ашылған.
- Мен Нәкеңмен жарты ғасырға жуық бақытты әрі баянды ғұмыр кештім. Бір-бірімізге жүрекжарды өлең арнадық, әр кездесуіміз алғашқы кездесудей әсер қалдыратын. Шаңырағымызда төрт бала өсіп өнді, бәрі де мұнайшылар. Отбасымызда барлығы да еңбекқор, жоғары білімді азаматтар. Балалары әке жолын қуып, Отанымыздың экономикасына өлшеусіз үлес қосты деп айта аламын. Біз Прорва, Тенгиз, Өзен мұнай кенішіндегі жаңа кенорындарын өндеуден бастадық. Қазір 11 немерем, 6 шөберем бар, сондықтан мен бақыттымын, - деді Нәсіпқали Марабаевтың жары Ләйла Марабаева.
Өкінішке қарай, 2007 жылдың тамыз айында мұнайдың негізін қалаған азамат Нәсіпқали Марабаев дүниеден озды. Өмірден өткенімен, жүректен кеткен жоқ. Артында өшпес із, баға жетпес байлық қалды.
Шара соңында «Нәсіпқали Марабаевтың өмірі туралы» ұйымдастырылған байқаудың жеңімпаздары марапатталды.
Айгүл ДӘДЕН Суреттерді түсірген Талант ҚҰСАЙЫН
[gallery td_select_gallery_slide="slide" ids="39812,39811,39809,39803,39808,39800,39801,39807,39806,39805"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
