«AKTAU.GOV» мобильді қосымшаcы арқылы арыз жаза аласыз!

Қала тұрғындары енді арыз-шағымды телефон арқылы жолдай алады. Бұдан былай  коммуналдық мекемелер, жол тасымалы, "Қала жолдары", басқа да қалалық әкімдікке қарайтын құзырлы органдардың есігін тоздырып немесе қоңырау шалып, операторды күтудің қажеті жоқ. Смартфоныңызға «AKTAU.GOV» мобильді қосымшасын жүктеп алсаңыз жеткілікті.

- Кез келген тұрғын әкімдік тарапына қойғысы келетін сауылын, арыз-шағым, өтініш, пікірін қосымшаның көмегімен жауапты мамандарға тікелей жолдай алады. Ал арыз-шағымыңызға құзырлы органдар аз уақыт ішінде жауап береді, - дейді Aktau.gov қосымшасын жасап шығарушы Mediana.kz компаниясының техникалық директоры Өмірбек Құрбанбаев.

Қосымшаның қалалық әкімдік мамандарына да арналған нұсқасы бар. Олар қай уақытта қай бөлімге қандай арыз түскенін бақылап, мониторинг жасап отырады, сондай-ақ, арызға жауаптың дер кезінде берілуін қадағалайды.

-  Бұдан бөлек, Қосымша арқылы қала жаңалықтары, мемлекеттік көрсетілетін қызмет түрлері мен хабарландыруларды оқи аласыз. Қолданушы шағымын фото, аудио және видеомен де жіберуге болады. Шағымданушы өзге адамның арыз-талаптарын оқи алмайды. Тек өзінің шағымы мен жауапты көре алады. , - дейді Өмірбек Құрбанбаев.

Мобильді қосымша маусым айынан бастап ресми түрде іске қосылды. Тұрғындар смартфонымен «Android» және «IOS» платформаларынан жүктей алады.  Айта кетейік, мобильді қосымша ҚР Заңнамасы аясында жұмыс істегендіктен міндетті түрде тіркелу қажет. Анонимді жолданған хат қабылданбайды.

Айгүл ДӘДЕН 

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.