Қазақтың ұлы ақыны деген құрметті атқа ие болған Мемлекеттік сыйлықтың және тәуелсіз «Тарлан» сыйлығының иегері, Қазақстанның Халық жазушысы Қадыр Мырза Әлі атындағы мәдениет және өнер орталығының «Дала дидары» атты әдеби-сазды көшпелі өнер ұжымы Жаңаөзен қаласына келді. Аталған өнер ұжымы «Мұнайшы» мәдениет үйінде «Қадыр жолымен...» жобасы аясында концерт қойды.
Кеште ақынның шығармашылығы шырқалды. «Ерен еңбегі үшін» медалінің иегері Дастан Есентеміровтың орындауындағы «Ақжайық» әнімен ашылған кеште ақынның шығармашылығына арналған бейнеролик көрсетілді. Шара барысында сөз алған қала әкімінің орынбасары Исахан Сағынбаев:
- «Ой орманынан» бастау алып, «Абыз ақын, Аңыз ақынға» айналған тума таланттың жыр жанашырлары, Жаңаөзен қаласына қош келдіңіздер! Жыр сүлейлері, мәдениет майталмандарының игі бастамасы сәтті болсын, - дей отырып қала әкімі атынан жобаны ұйымдастырушы орталық директоры Бауыржан Халиоллаға Қадыр ақынның шығармашылығын насихаттауда атқарып жүрген еңбегі үшін алғыс айтып, мұндай кештерді көптеп өткізу қажеттігін жеткізді.
Содан соң Қадыр ақынның сөзіне жазылған «Тамаша», «Сыған серенадасы», «Қазақтарды шетелдік қонақтарға таныстыру», «Өз елім», «Атамекен», «Асыл әжем» атты қазақтың махаббатына бөленген әндері шырқалып, өлеңдері оқылды. Кеш тізгінін ұстаған журналист Бауыржан Ғұбайдуллин сахна төрінде Қадекеңнің «қалжың қоржынын» ашты.
Әр дәуір өз ақынын тудырады десек, Қадыр Ғинаятұлы Мырзалиев шығармалары оның өзі өмір сүрген жылдардағы көркем тілмен жазылған шежіре десе болады. Қадыр ақынның поэзиясы сан қырлы. Ол Отан, дәуір, халық, қазақ мінезі, елге, жерге сүйіспеншіліктен бастап, барлық жақсылық атаулыға сүйсініп, адал еңбек, пәк махаббат, биік адамгершілік, туған табиғатқа деген немқұрайлылыққа дейінгі барлық әлеуметтік саланы қамтиды.
Тағы оқыңыздар: Құлсарыда Бопай ханымның қоғамдық-саяси қызметіне арналған конференция өтті Кеш барысында қазақтың танымал ақыны, Қазақстан Республикасы Мемлекеттік сыйлығының лауреаты, «Құрмет» орденінің иегері және халықаралық «Алаш» сыйлығының лауреаты Есенғали Раушанов және белгілі ақын, «Дарын», Қазақстан Жазушылар Одағының Т.Айбергенов атындағы сыйлығының және әдебиет саласындағы ӘСЕМ КЕШ Президенттік стипендияның иегері Светқали Нұржан сөз сөйлеп, Қадыр ағалары туралы әдемі естелік айтты.Есенғали Раушанов:
- Асылы, біз бақытты халық екенбіз, Қадекең сияқты ақынымыз болды. Ол өйткені қазақ деген халықтың портретін жасады. Қадекең туралы әңгіме, ол - қазақ туралы әңгіме. Арада жылдар өтер, ғасырлар өтер. Уақыт өткен сайын біз Қадекеңнің қадірін біле түсеміз. Біз ағамызды жақсы көрдік. Үнемі жанында еріп жүретін едік. Қашан да бізді қолдап жүретін еді. Қадыр шығармашылығын насихаттау жұмыстары бұдан кейін де жалғаса бермек. Елбасымыз айтқанындай, рухани жаңғыру дегеніміз, міне, осындай шараларға сәйкес келеді.
Светқали Нұржан:
- Қадыр ағамыз өзі құдіретті кісі еді. Қадыр араламаған бақ, ол шықпаған тау жоқ шығар. Ол кісі жырламаған тақырып жоқ шығар. Мен маңдайы мен бағым бар адаммын. 1979 жылы Алматыға барып, оқуға түскенде әуелі алдымнан Әбіш Кекілбаев ағам шықты. Содан кейін Ғұбайдолла Айдаров ағамның үйінде болдым. КазГУ-дың филология факультетінің 302 аудиториясына алғаш рет сабаққа барғанымда Қадыр ағамыз лекция оқып жатыр екен. Маған дәріс берген Қадыр Мырза Әлі мен академик Рымғали Нұрғали секілді лекция оқыған ешкімді көрген жоқпын.
Қадыр ақынның бүгінгі ұрпақ үшін орны ерекше екенін мақтанышпен айтамыз! Аяулы Атамекенін «Күннің өзі ұясына, қимай оны батады екен» деп сипаттаған ақынның жырлары ұрпақтың мәңгілік жадында. Кеш соңы Қадыр ағамыздың сөзіне жазылған Ескендір Хасанғалиевтің «Атамекен» әнімен аяқталды.
Гүлсім ОСПАН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
