Көрнекті мемлекет және қоғам қайраткері, партия-кеңес кезіндегі белгілі басшы, еліміздің мұнай-газ өндірісінің шебер ұйымдастырушысы, «Мұнайшы» қоғамдық қорын құрушылардың бірі және осы қордың тұңғыш атқарушы директоры, Ақтау, Жаңаөзен қалаларының құрметті азаматы Нәсіпқали Әбуғалиұлы Марабаев биыл мәртебелі 80 жасқа толар еді.
Ардагер тұлға, өз елінің патриоты, біздің мақтаныш етер жерлесіміз Нәсіпқали Әбуғалиұлы Марабаев 2007 жылғы 19 тамызда 70-ке толар шағында кенеттен қайтыс болды.
Мұнайлы Атырауда туып, көп балалы отбасында тәрбиеленген, орта мектепті бітіре сала Мәскеудің Губкин атындағы мұнай институтын тәмамдаған ол қарапайым бұрғышыдан «Маңғышлақмұнай» өндірістік бірлестігінің бас директорлығына дейінгі еңбек жолынан өтті. Мұнайшы-инженер Марабаев – Маңғыстау мұнайының бастауында тұрған бірден-бір қайраткерлердің бірі. Ол сондай-ақ Қазақстан Республикасын мұнайлы державалар қатарына қосу жолында да ерен еңбек етті.
Әсіресе оның ұйымдастырушылық қабілеті, басшыларға тән білімі мен білігі, өндіріс саласындағы тегеурінді таланты мен тәжірибесі Маңғыстау облыстық атқару комитетін басқарған жылдарында, облыстық партия комитетінің хатшысы кезінде, Қазақ КСР Халықтық бақылау комитеті төрағасының бірінші орынбасары уақытында жарқырай көрінді. Дәл осы мезгілдерде ол көрнекті мемлекет және қоғам қайраткері ретінде қыруар шаруалар атқарып, елдің ерекше сүйіспеншілігіне бөленді. Сансалалы қызмет атқарып жүрсе де, Нәсіпқали Әбуғалиұлы өзінің түпкілікті кәсібі – мұнай саласын бір сәт те ұмытпады және мұнайшы дос-жарандарымен де байланысын үзбеді, өмірінің соңына дейін сыйласумен кетті.
Оның ұйымдастырушылық, басшылық талантының барынша ашылған тұсы – одақтық маңызы бар «Маңғыстаумұнайгаз» өндірістік бірлестігін басқарған жылдары екенін жоғарыда айтып өттік.
Нәкеңнің бүкіл ғұмыры мігірсіз еңбекпен өткені белгілі, ол осындай мерейлі атақ абыройымен зейнетке шықты, зейнеткер екенмін деп бір күн де дем алған жоқ, нарықтық экономиканың алғашқы жылдарында күнкөрісі құлдырап кеткен ардагер-мұнайшылардың ауыр халі оған бір сәт те маза бермеді. Елімізде 200-ге жуық мұнай-газ кеніштерін ашқан ардагер-мұнайшылар дәл осы кезеңде бейшара күйге түсті. «Сабақты ине сәтімен» дегендей, ақыры бұрынғы Гурьев облыстық партия комитетінің бірінші хатшысы, республиканың көрнекті мемлекет және қоғам қайраткері Асқар Алтын- бекұлы Құлыбаевпен, белгілі геолог Орал Ақшолақовпен ақылдаса отырып, «Мұнайшы» қоғамдық қорын құруға бел байлады.
Қордың басты жарғылық мақсаты – осы саланың ардагер-мұнайшыларына шынайы қамқорлық жасап, жан-жақты көмектесу, республиканың мұнай-газ тарихын қалпына келтіру және әйгілі мұнайшылардың атақ-даңқын ұлықтау, тағы да басқа қайырымдылық шаралары болып белгіленді. Осы біраз ғана мерзім ішінде, атап айтқанда екі жарым жылдай уақытта, қордың атқарушы директоры бола жүріп Марабаев қыруар шаруа тындырды. Мұқтаж мұнайшыларға қаржылай қайырымдылық көмек көрсетілді. Қазақстан Мұнай энциклопедиясының 2 томдығын толықтырып қайта шығарды, «Қазақ мұнайының ардақтылары» сериясымен әйгілі мұнайшылардың ғұмырнамалық кітаптары жарық көрді, республика мемлекеттік мұрағатында мұнайшы әулеттерінің өмір дерегі тіркелді, Орал, Жаңаөзен қалаларында «Мұнайшылар даңқы» аллеясының құрылысы басталды.
Осылайша, өзінің қоғамдық-қайырымдылық жұмыстарын өрістетіп отырған «Мұнайшы» қоғамдық қоры 2006, 2011 және 2012 жылдары қатарынан үш мәрте республикалық конкурстардың жеңімпазы атанды, сондай-ақ республикалық «Президент және халық» газетінің «Жыл таңдауы» агенттігінің алтын белгісі және сертификатымен марапатталды. Нәсіпқали Әбуғалиұлының бай тәжірибесі, өнеркәсіп саласындағы білігі мен таланты әр кезде де кәдеге асты, осыны дер кезінде сезінген Маңғыстау облысының әкімі Қ.Көшербаев Нәсіпқали Марабаев ағасын өзіне кеңесшілікке шақырды, ол сондай-ақ облыстың ардагерлер кеңесін де қоса басқаратын болды. Нәкеңнің осы қызметте жүріп, қыруар істер тындырғанын Қ.Көшербаев Марабаевты соңғы сапарға аттандырар сәтте тебірене әңгімеледі. Нәсіпқалидай ел аманатын арқалап, ат үстінде жүрген азаматтың кенеттен дүниеден өтуі – бүкіл Қазақстан халқы үшін ауыр қаза болды. Елбасы Н.Назарбаевтың өзі Н.Марабаевтың ұзақ жылдар бойы республика өнеркәсібіне қосқан зор үлесін ерекше атап өтіп, отбасына көңіл айту жеделхатын жолдады.
Тағы оқыңыздар: Мәйіт донорлығы: кім қарсы, кім қолдайды?2007 жылғы қазан айында құрылтайшы- лар мен оның серіктері «Мұнайшы» қоғамдық қорына Н.Ә.Марабаевтың есімін беруді бірауыздан қолдады. Бұл сөз жоқ, мұнай-газ саласының сардарына айналған, өмірінің соңғы күндеріне дейін елі үшін еңбек еткен қайраткерге, аяулы азаматқа деген шынайы құрмет еді. Марабаев есімін ұлықтауда республика жұртшылығы да қалыс қалмады. Жаңаөзен қаласындағы үлкен даңғылға, Ақтау қаласындағы мектеп-лицейге Нәкеңнің аты берілді.
Иә, Марабаев салып кеткен сара жол ешқашан жоғалмақ емес. Өзі негізін салып кеткен осы жолмен бүгінде еліміздің мұнайшылары, ізбасарлары, шәкірттері сап түзеп келе жатыр. Сондай-ақ балалары да әке аманатын сәтті жалғастыруда. Өз ғұмырында азаматтық парызы мен ел алдындағы перзенттік аманатын адал атқарған періште көңіл, жайсаң жан – Нәсіпқали Әбуғалиұлын еске алуға қастерлі тұлғаның көзін көрген, қамқорлығын сезінген, шарапатынан үлес алған дүйім жұрттың жиналуы – жоғарыдағы сөзіміздің айқын дәлелі болмақ.
Нәсіпқали Әбуғалиұлы – көрнекті мемлекет және қоғам қайраткері ғана емес, отбасында абыройлы әке, адал жар, сыйлы отағасы. Балаларына деген мейірімділігі, қамқорлығы өз алдына, зайыбы Ләйлә Оқанқызына деген мәңгі өшпес сезімі кейінгілерге үлгі болғандай. Қандай жағдайда болмасын, түрлі сапарлардан келгенде міндетті түрде жарына гүл сыйлау кез келген азаматтың қолынан келмейтіні түсінікті. Бұл – тек Нәсіпқали Әбуғалиұлының ғана бойына біткен ерек- ше мінез, қастерлі қасиет. Нәкең мен Ләйлә Оқанқызы екеуі екі ұл, екі қыз тәрбиелеп өсірді. Олар да әке жолын әрі қарай жал- ғастырып, төртеуі де Қазақстан мұнай саласының басшыларына, білікті мамандарына айналды. «Атасына біткен – батасына да бітеді» дегендей, енді Марабаевтың жолымен оның немерелері жүріп келеді. Ендеше, Н.Ә.Марабаевтың сара жолы болашаққа жалғасуда деуге толық негіз бар.
Көрнекті мемлекет және қоғам қайраткері, ғазиз досымыз – Нәсіпқали Әбуғалиұлы Марабаевтың 80 жылдық мерейтойында ардагер азаматты еске ала отырып, оның отбасына баянды бақыт, берекелі тірлік, саусаламатты өмір тілейміз!
Ізгі тілекпен: «Мұнайшы» ҚҚ құрылтайшылары А.Құлыбаев, О.Ақшолақов,
атқарушы директор С.Жылқайдаров
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
