Жуырда ОКҚ Маңғыстау облыстық филиалы алаңында Астрахань облысының Құрманғазы атындағы аймақтық мәдени орталығының өкілдерімен баспасөз мәслихаты өтті.
Мәдениет ошағының Маңғыстау, Атырау және Батыс Қазақстан облыстары мен жергілікті билік өкілдерінің қолдауымен 2005 жылы іргесі қаланды. Орталық қазақ халқының салт-дәстүрі мен әдет-ғұрыпын, ұлттық мәдениет құндылықтары мен рухани байлығын, тарихи жәдігерлерін дәріптеу, ұлтаралық татулық пен ымыралы ынтымақтастықты дамыту бағытында қызмет етеді. Мәдени орталықта «Самал» қазақ әндері ансамбілі, «Белый город» орыс халық аспаптар ансамблі және «Алтын» халықтық би ансамблінің өнерпаздары және жекелеген әншілер мен домбырашылар бас қосады. Қазіргі таңда Астрахань жерін 150 мыңға жуық қандастарымыз мекен етеді екен. Атамекеннен шалғайда өмір кешкен қазақ бауырларымыз ұлттық болмысы мен келбетінен көз жазып қалмаудың әркез қамын ойлайды. Бесікке салу, шілдехана, тұсау кесу, асар сынды ұлттық салт-дәстүрлер, қазақы жөн-жоралғы, ырым, тыйым рәсмідер әлі күнге дейін өз тәрбиелік мән-маңызын жоғалтпаған.
Орталық директорының орынбасары Светлана Альбикова сөзіне сүйенсек, мәдени кешен екі түрлі бағытта қызмет етеді. Бірі – мәдени даму, өзгесі туристік әлеуетті арттыру бағыты.
«Астрахань өлкесіне келген ресми делегация өкілдері, туристер міндетті түрде Алтынжар елді мекенінде орналасқан Құрманғазы кесенесіне бас соғады. Арнайы туристік жорық ұйымдастырылып, ұлы күйшінің өмір жолы мен шығармашылығынан сыр шертетін тарихи деректер, маңызды материалдар кеңінен таныстырылады. Сонымен қоса, Еділ өзенінің төменгі сағасы мен Жайық аралығын ІХ ғасырдың соңы және ХХ ғасырдың басында мекен еткен Бөкей Ордасы қазақтарының Құрманғазы мұражайында жинақталған тұрмыс бұйымдары, музыкалық аспаптары назарға ұсынылып, тұрмыс-тіршілігі жайлы мағлұмат беретін тарихи құжаттар көрсетіледі. Мәдени орталыққа жыл сайын 25 мың турист пен зияратшы қауым келеді»,-дейді С.Альбикова.
«Самал» қазақ ансамблінің жетекшісі Рустам Сибекбаев Ресей жерінде қазақ ұлттық музыкасын дәріптеп, жат жұртта халқымыздың мәдени мұрасын ұрпақ кәдесіне жаратып жүрген жан. Ұстаз әрі ұлт жанашыры ретінде ұлттық өнерді ұлықтау, ата салтты ардақтау, қазақы киімді қастерлеу, ана тілдің абыройын асқақтатуды бөтен елде бой түзеп, жат елде ер жеткен есті ұрпақ санасына сіңіріп келеді.
Меймандар Маңғыстау өлкесіне алғаш рет табан тіреді. Жұма күні өнерпаз ұжымның М.Өскінбаев атындағы Маңғыстау облыстық филармониясында шығармашылық концерті өтті.
Кеш шымылдығы «Құрманғазы атындағы аймақтық мәдени орталығының» тыныс-тірлігін баяндап, іс-қызметін айғақтайтын бейнебаянмен түрілді. Алдымен аймақ басшысының орынбасары Шолпан Ильмухамбетова арнайы сөз сөйлеп, ізгі лебізін білдірді.
«Екі елдің ғасырлар тереңінен тамыр тартқан достығы мен ынтымағы тағдырдың талай сындарына төтеп беріп, бүгінде жарқырай түсіп, нығайып отыр. Көрші қонған қос ел Қазақстан мен Ресей татулық пен бейбітшіліктің мекеніне айналып, өзара тығыз байланыстың арқасында болашаққа сенімді қадам жасауда.
«Құрманғазы атындағы аймақтық мәдени орталығының» өкілдеріне біздің киелі өлке Маңғыстауға қош келдіңіздер! – дейміз. Екі елдің арасындағы мәдени, экономикалық және саяси байланыстар өркендей берсін»,-деді ол.
Сахна төріне сән берген «Самал» ансамблі Құрманғазының «Серпер» күйімен көрермен көңілін бір серпіп тастады. Домбыра көмейінен төгілген күй күмбірі өнер сүйер қауым жүрегін баурап, еліте түсті. Ансамбль орындауындағы «Адай» күйі тыңдарман қошеметіне ие болды. Әуезді үн әуелей, әсем әндер шырқалып, мың бұрала билеген бишілер кеш ажарын аша түсті. Руслан Грачев жетекшілік ететін «Белый город» орыс халық аспаптары ансамблі халықтың ыстық ықыласына бөленді. Орталық директоры Амангелді Әбілғазиев, Орал қаласында өткен «Атамекен» халықаралық фестиваль-байқауының дипломанты Амина Айдаралиева мен жас әнші Өмірзақ Зинелғабиденов тамылжыта ән салып, көтеріңкі көңіл-күй сыйлады.
Құрметті қонақтарға Маңғыстау облысы атынан 30 сахналық костюм, әдістемелік құралдар сыйға тартылған еді. Өз кезегінде шығармашылық кеш соңында өнерпаз меймандар Маңғыстау облысы әкімдігіне, өңірлік мәдениет басқармасы басшына және филармония директорына естелік сыйлық ретінде Құрманғазы баба кесенесі бейнеленген картиналарды тарту етті. Меймандар аймақ басшылығына, өңірлік мәдениет басқармасының басшыларына зор алғысын айтып, ризашылықтарын білдірді.
Голрох Жеменей Суреттерді түсірген: Талант Құсайын