Ақтауда маңғыстаулық күйші Әлия Қарамұханның шығармашылық кеші өтті

Ақтауда маңғыстаулық күйші Әлия Қарамұханның «Ақжелең күй - ару саз» атты шығармашылық күй-кеші өтті, деп хабарлайды mangystaumedia.kz Қоғамдық коммуникация орталығына сілтеме жасап.

Кеш барысында көп орындалмайтын, ел жадынан ұмыт болып бара жатқан Маңғыстаудың тың күйлерін насихаттады. Шығармашылық кеш 3 кезеңнен тұрды.

- Бірінші кезеңде ата-бабамыздан келе жатқан дәстүрлі күйлер орындалса, екінші кезеңде домбыраның басқа аспаппен үндестігін тыңдарманға ұсындық. Ал, үшінші кезеңде шетелдің шығармаларында біздің аспаптың мүмкіндігі көп деген бағытты ұстандық, - деді Әлия Қарамұхан.

Күйшінің айтуынша, күй кешіне өзінің ұстазы, мәдениет саласының үздігі Жұмабек Қадырқұлов Астана қаласынан арнайы келген.

-Әлия Қарамұхан - менің ең үздік шәкірттерімнің бірі. Үлкен жетістіктерге жетті, халықаралық, республикалық конкурстардың лауреаты атанды. Бүгінде біз Маңғыстаудың тың күйлерін зерттеп жатырмыз. Қазіргі таңда 200-ге жуық аттары шықпаған тың күйлерді зерттеп тауып, оны нотаға түсіріп концерттерде, жарыстарда орындап жүрміз. Осы орайда Әлияның еңбегі оразан зор, - деді Жұмабек Қадырқұлов.

Күй кешіне жиналған көрерменнің қарасы қалың болды. Әлия Қарамұхан бір жарым сағат бойы әр күйдің шығу тарихын айта отырып, ерекше шығармаларды орындап шықты.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.