Облыста 125 медицина қызметкері вакцина алды

Вакцинациялау №2 Ақтау қалалық емханасында жүргізілді. Бұл туралы Қоғамдық коммуникация орталығында өткен брифингте Маңғыстау облысы санитариялық-эпидемиологиялық бақылау департаментінің басшысы Ғазиз Надуев мәлімдеді, - деп хабарлайды mangystaumedia.kz сайты.

Оның айтуынша, вакцинадан кейінгі асқынулар мен реакциялар тіркелген жоқ. Әрі қарай вакцинацияланған адам медициналық бақылауда болады.

Маңғыстау облысында 2020 жылдың 27 наурызынан 2021 жылдың 9 ақпанына дейін коронавирус инфекциясының 4 127 жағдайы тіркелді. Оның ішінде шағыммен – 1 448 (35%), шағымсыз – 2 679 (65%) жағдай. Ауру деңгейінің көрсеткіші – 560,1. Соңғы репродуктивті көрсеткіш – 0,9. Төсек корының көрсеткіші – 24%.

«Эпидемиологиялық талдау қорытындысы бойынша инфекцияға шалдыққандардың 50%-дан астамы КВИ індетін жұқтырғандармен тығыз қарым-қатынаста болған. 2021 жылдың 1 қаңтарынан бастап оқушылар арасында коронавирустық инфекциясының 66 жағдайы тіркелді.

Оның ішінде оффлайн 29 оқушы, онлайн 37 оқушы тіркелген. Жалпы облыс бойынша 155 753 оқушы бар. Жыл басталғалы 82 413 оқушы оффлайн, 73 340 оқушы онлайн әдіспен оқиды. Мектеп интернаты бойынша 2 329 оқушы. Ақтау қаласы бойынша мектепке дейінгі 3 мекемеде коронавирус инфекциясының жағдайлары анықталып отыр», - деді Ғазиз Надуев.

Өңірде коронавирус инфекциясын ПТР тәсілімен анықтайтын мемлекеттік және жеке меншік 7 зертхана бар. Оның 1-уі Ұлттық сараптама орталығы, 5-уі жеке меншік зертхана (Олимп, Чакур, Инвиво, Эталон, Алатау Клиник) және тағы бір зертхана Жаңаөзен қалалық көпбейінді ауруханасында орналасқан. Аталған лабораторияларда барлығы 251785 адам тексерілді. Орта есеппен тәулігіне 383 адам ПТР зерттеуден өтеді. Қазір ұлттық сараптама орталығында 31292 тест сынамасы бар.

Облыста 1 қантардан бастап 24 мониторинг тобы құрылды. 1 қаңтар мен 9 ақпан аралығында 186 рейд жүргізіліп, 2316 нысан тексерілді. Рейд барысында 11 нысанда бұзушылықтар анықталып, 9 (6 жеке кәсіпкер, 3 жеке тұлға) әкімшілік хаттама (2 млн. 143995 тг.) толтырылды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.