Аналарға арналған алғашқы тренинг
[ 2019 ] 25 қыркүйек, 07:00 | Қоғам
Жуырда Ақтау қалалық әкімдігінің ұйымдастыруымен көпбалалы аналарға арналған семинар-тренинг өтті, - деп хабарлайды mangysataumedia.kz сайты.
Ақтау қалалық әкімдігінің ұйымдастыруымен Ақтауда алғаш рет көп балалы аналарға арналған семинар-тренинг болып өтті. Аналарға психологиялық көмек көрсету мақсатында өткізілген шараға Н.Жантөрин атындағы облыстық музыкалық драма театрының бас режиссері Гүлсина Мерғалиева, белгілі сынықшы Айнұр Асқарқызы, «Жастар жетістіктері» қоғамдық қорының директоры Жақсыгүл Маханбетова, облыстық соттың судьясы Гүлажар Бақытжанова, «Риза-Ана» қоғамдық қорының басшысы Бибігүл Рамазанова, психолог Нұржамал Исамбаева және республикалық "Ақжүніс" аналар қоғамының Маңғыстау облысы бойынша өкілі Анар Амангелдіқызы қатысып, алғашқы сөзді Ақтау қаласы әкімінің орынбасары Гүлжазира Алдашева алды. Ол кездесудің маңыздылығына тоқталып, алдағы уақытта рухани азық беретін осындай тренингтерді жүйелі түрде өткізуге ниетті екенін айтты.
Айта кетейік, көпбалалы аналар үшін жасалған бұл игі шара өңірімізде алғаш рет өткізіліп отыр. Басқосуға күміс, алтын алқа иегерлерін қоса алғанда бас-аяғы 70-тен астам ана қатысты.
«Жастар жетістіктері» қоғамдық бірлестігінің директоры Жақсыгүл Маханбетова әйел адамның қоғамдағы рөлі туралы әңгіме өрбітіп, қатысушылар арасында жаттығу жұмысын жүргізді. Одан бөлек, спикерлер «Әлемді өзгекрткің келсе, өзіңнен баста», «Өзіңді-өзің жақсы көр», «Отбасылық құндылықтарды дәріптеу», «Сүйікті іс – табысты кәсіп», «Жағымсыз ойлардан қалай арылуға болады?» деген тақырыптарда сөз қозғап, біраз мәселені саралап, ортаға салды.
Жиын барысында тілге тиек етілген баспана мәселесі – бүгінде өзекті болып отыр. «Баспана мәселесі шешілсе, билікке тізерлеп отырып алғыс айтар едік. Жылдар бойы үй жалдап өмір сүру өте қиын», - дейді аналар.
Семинар-тренингті алдағы уақытта міндетті түрде өткізуді сұраған келіншектер жанайқайын да айтып, көңіл де көтеріп ерекше әсермен серпіліп қайтты.
Махаббат НҰРЖАНҚЫЗЫ
Суреттерді ұсынған ұйымдастыру алқасы
[gallery td_select_gallery_slide="slide" ids="85698,85697,85699,85700,85701"]
1239
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
