Құтты Сенек ауылы қос қуанышқа бөленді

Маңғыстау облысының әкімі Серікбай Трұмов Қарақия ауданының Сенек ауылында жаңадан салынған "Резервуарлар мен су сорғылау станциясы" нысанына барып, іске қосылу жұмысымен танысты. Жаңа нысанның тетігін қосып, нысанды аралады. "AY -Servise LTD" ЖШС- нің мердігерлігімен салынған ғимаратта тәулігіне 455,4 текше/метр су сорады. Жыл өткен сайын мал мен басы қатар өсіп, кеңге қанат жая бастаған ауыл тұрғындарының тұрмысы үшін су - тіршілік ғана емес, шаруашылықтың да қайнар көзі. Сондай-ақ аймақ басшысы Серікбай Өтелгенұлы бастаған облыс өкілдері, депутаттар, Қарақия ауданының әкімі Қ.Беков және ауданның ардақты азаматтары, ауыл тұрғындары жаңа спорт залдың ашылуына қатысты. Бұл сенектіктердің көптен күткен қуанышы болатын. Қазақстан Республикасының Тұңғыш Президенті, Елбасы Нұрсұлтан Әбішұлы Назарбаевтың 2018 жылғы 5 қазандағы «Қазақстандықтардың әл-ауқатының өсуі: Табыс пен тұрмыс сапасын арттыру» атты Қазақстан халқына Жолдауында «Өңірлік деңгейдегі резервтерді тауып, бұқаралық спорт пен дене шынықтырудың қолжетімділігін арттыру қажет» - деп атап өтті. Сонымен қатар осы Жолдауда, Үкіметке және әкімдерге кем дегенде 100 дене шынықтыру-сауықтыру кешенін салуды тапсырған болатын. Осыған орай және «Болашаққа бағдар: Рухани жаңғыру» бағдарламасы аясында НКОК компаниясының демеушілігімен салынған спорт мектебінің ашылуында Маңғыстау облысының әкімі Серікбай Трұмов, Сенек ауылының тұрғыны атынан Өтебаев Нұрымдар құттықтау сөз сөйлегеннен кейін, НКОК компаниясының әлеуметтік инфрақұрылымдық жобалар бойынша құрылысшы-инженер Серік Сакенов нысанның симболикалық кілтін табыс етті. Ауыл ардагерлері салтанатты лента қию рәсімін жасады. Қос қуанышқа бөленген ауылдың ардагерлері салауатты өмірге бет бұрған жас спортшыларға бата беріп, ақ жаулықты әжелер шашу шашқан соң, жұмыс тобы жаңа нысанды аралап көрді. НКОК компаниясы салдырған бұл спорт мектебінде 7 спорт түрінен 250-280 бала спортпен шұғылданып, шағын футбол, волейбол, баскетбол, түрлі жекпе-жек ойындарын өткізуге болады. Айта кетейік, бұл ауылда аймағымызға танымал "Кудо Сенектің" жас қырандары тұрады. Жаңа спортзалды болған өрендердің қуанышында шек жоқ.

Шынар КЕНДІН

[gallery td_select_gallery_slide="slide" ids="84625,84621,84623,84620,84618,84627"]