Мұнайлы ауданы әкімінің есебі тыңдалды

Мұнайлы ауданы әкімдігінде аудандық мәслихаттың кезекті қырық үшінші сессиясы өтті. Сессияда аудан әкімі Рахат Елтизаровтың бірінші жарты жылдықта ауданның әлеуметтік-экономикалық дамуы жолында атқарған жұмыстары мен алда тұрған міндеттері туралы есебі тыңдалды. Есептік баяндамасында аудан басшысы білім беру, денсаулық сақтау, кәсіпкерлік, әлеуметтік, ауыл шаруашылығы сияқты барлық салаларды қамтып, ауданның жарты жылдықтағы жетістіктерін айтты. ─ Жыл басынан бүгінгі күнге дейін 779 нысан пайдалануға берілді. Оның ішінде 756 тұрғын үй, 23 тұрғын үйге жатпайтын ғимарат салынды. Мемлекеттік көрсетілетін қызметтердің ауданға қарасты жергілікті атқарушы органдармен 91 мемлекеттік қызмет түрі көрсетіледі. Өткен жылдың шілде айына дейін көрсетілген мемлекеттік қызмет саны 27115 болса, осы жылдың шілде айына дейін көрсетілген мемлекеттік қызмет саны — 35354. Білім беру саласы бойынша 2018-2019 оқу жылында 739 түлек бітірді. Оның ішінде 702—күндізгі оқу түлектері, 37—кешкі мектеп түлектері. Алтын белгі – 19, үздік аттестат – 39. Ауданды балабақшамен қамтудың пайыздық көрсеткіші 2017 жылы 83% болса, 2018 жылы 96,7%, ал биыл жеті ай ішінде 98,2%-ды құрады. Тіркелген шағын кәсіпкерлік субъектілері – 5609 (01.07.2018 жыл – 5418), шағын кәсіпкерлікте жұмыспен қамтылғандардың саны – 9897 адам, – деді аудан басшысы Рахат Тезекбайұлы. Әкімнің айтуынша, өткен жылдың жарты жылдығына дейін ауданымызда 2156 бала дүниеге келсе, осы жылдың жарты жылдығына дейін 2195 бала өмірге келіпті. Әрине, ауданда өзекті мәселелер де жоқ емес. Солардың ішінде аудан мектептеріндегі 3 кезеңдік оқу процесін жою және балаларды тасымалдап оқытуды болдырмау, Мұнайлы аудандық орталық аурухана құрылысын бастау, ауданда ауылішілік автомобиль жолдарын салу және жөндеу, елді мекендерді ауыз сумен қамтамасыз ету алдыңғы кезекте тұр. Р.Елтизаров мұндай мәселелерді біртіндеп шешудің жолдары қарастырылып жатқандығын түсіндірді. Жер мәселесіне келер болсақ, аудан аумағындағы ауыл және ауылдық округтердің бекітілген бас жоспарларына сәйкес 2907 жер телімін беру мүмкіндігі қарастырылған. Ауылішілік жолдар мәселесінде жалпы құны 1 млрд. 543 млн.теңге болатын, барлығы 13,2 шақырым автокөлік жолының мемлекеттік сараптама қорытындысы алынды. Сессия барысында ауыл әкімдерінің есептері тыңдалып, көкейде жүрген сұрақтарға толымды жауаптар берілді.

Әсел ТАҢАТАРОВА