Өжет те өткір тергеуші қыз

Қазіргі таңда полиция мамандығы тек ер адамның жұмысы ғана емес. Құқық қорғау органдарында ер адамдармен иық тірестіріп қызмет етіп жүрген әйелдер қауымы жетерлік. Олар жүктелген күрделі міндеттерге, зор жауапкершілікке, күндіз де, түнде де жалғасатын жұмыс жүйесіне қарамай, ішкі істер органдарында қызмет атқарып, аналық, әйелдік, келіндік міндеттерімен қатар, полиция қызметкерінің міндеттерін де абыроймен атқарып келеді. Арулар нәзік жаратылысты екеніне талас жоқ. Ер-азаматтарға тән қайраттылық, адуындылық, ожарлық оларға жат. Қыз баласы көбіне инабаттылығын сақтайды. 8 наурыз – Халықаралық әйелдер күні мерекесі қарсаңында, оқырмандардың назарына қауіпсіздік пен тыныш­тық күзетінде жүріп, халықтың құқығы мен бостандығын қорғауда алдыңғы сапта көрінетін, қатаң тәртіпте қызмет етсе де, өзінің нәзіктігі әрі жұмсақ жүректілігін сақтай білген тергеуші ару жайлы сыр шертпекпіз. Тергеуші болу – қиын емес. Әрине, егер сіз өз мамандығыңызды жақсы көріп, өзіңіз­дің атқарып отырған ісіңізден ләззат алатын болсаңыз. Дәл осы принциппен өмір сүретін кейіпкеріміз – Ақтау қаласы полиция басқармасы, тергеу бөлімінің тергеушісі полиция лейтенанты Айнура Истиярова. Айнураны көрген жандар оны тергеуші қызметкері деп ойламайды. Табиғатынан да­рыған нәзіктігі, сыпайылығы, биязылығы оны қатаң тәртіппен байланысып тұратын тергеу қызметіне қимайтын секілді. Оның бойында сырт көзге байқала бермейтін өткірлік пен өжеттік бар. Айнураның жоғары кәсібилігі мен төзімділігін әріптестері ғана емес, басқа да құқық қорғау органдарының қызметкерле­рі де өте жақсы біледі және бағалайды. Ол қызметтік міндеттерін үлгілі орындап, жақсы көрсеткіштер көрсеткені үшін бірнеше мәр­те марапатталған. Тергеуші болып жұмысқа орналасқанына аз ғана уақыт болған жас маманмен әңгімелесуге арнайы бардық. Ол – қысқа мерзімде нағыз маман екенін дәлелдей білген нәзік жанды тергеуші. Оның жасы 22­ де. – Осы мамандықты жаныңыз сүйіп таң­дадыңыз ба? Қай өлкенің тумасы боласыз? – Мен ІІМ Б.Бейсенов атындағы Қарағанды академиясында білім алдым. Академияға оқуға түсерде, курсанттарды қабылдар алдында іріктеу болды. Онда спорт жағынан түрлі емтихандардан өттік. Бір айдан кейін оқуға түскендерді шақыртты. Біз алғашында сапта қалай жүруді үйрендік. Өзім Астрахань қаласынан боламын. Үйде үшеуміз. Үйдің үлкені мен. Бұл мамандықты таңдағанымда, ата-­анам қыз балаға қиын болады деп қарсы болды. Олар маған басқа мамандықтарды ұсынды. Дегенмен мен осы саланы таңдадым. – Оқуды аяқтап, осы жұмысқа бірден кірісіп кеттіңіз бе? Қызметіңіздің жүгі де ауыр, оны алып жүру сізге қиын емес пе? – Қыс мезгілінде академиядан практикаға жіберді. Мен қылмыстық іс бөлімінде тағы­лымдамадан осында өттім. Одан тергеу бө­лімінде бірнеше уақыт үлкендерден жұмыс барысын үйреніп жүрдім. Оқуды бітіріп келгесін бұйрыққа сәйкес тергеу бөліміне тергеуші етіп тағайындады. – Қызметіңізге кіріскелі бері неше іс қарадыңыз? – Қырыққа жуық іс қаралды. Олардың ішінде тоқтатылған істе болды. – Тергеу барысында айыпталушы тарапынан қандай да бір қиындық бола ма? Сондай жағдайда не істейсіз? – Барлық тергеу амалдарын жүргіземіз. Қажетті нақты сұрақтар қойып, мардымды жауап алуға барынша тырысамыз. Айыпталу­шыға тергеуші тарапынан психологиялық, физикалық сұрақтарды қоюға бізге рұқсат жоқ. Қажетті сұрақты қоямыз, айыпталушы өзінің жауабын береді. – Сіз үшін ең қиын тергеу туралы айтып бере аласыз ба? – Бізге жас мамандарға алдымен күрделі емес, орташа деңгейдегі істі береді. Бізді тәжірибелі тергеушілер үйретеді. Әзірге қиындық тудырған іс болған жоқ. – Тергеу барысында айыпталушының тағдырына алаңдаған сәтіңіз болды ма? – Менде ондай болған емес. Тергеушіге олай жасауға болмайды. Барлығы заң шеңберінде қаралады, тексеріледі. – Бос уақытыңызда немен айналысасыз? – Жұмыстан кейін өзім үшін каратэ­до спорт түрімен айналысамын. Түрлі жанрдағы кітаптарды оқығанды жақсы көремін. Достарыммен қыдырып, бос уақытымды пайдалы өткізуге тырысамын. Бізде басқармада арна­йы дене шынықтырумен айналысатын зал бар. Ол жерде уақытпен барлық қызметкер бекітілген. Қызметкерлердің аптасына үш рет спортпен айналысуға мүмкіндігі бар. – Үйде тамақ әзірлейсіз бе? – Иә, әрине. Асханада түрлі тәттілерді дайындағанды ұнатамын. Жұмыста тергеушімін. Үйде барлық қыздар секілді үй тірші­лігімен айналысамын. Ет, манты дайындаған­ды жақсы көремін. – Елбасы биылғы жылды «Жастар жылына» арнады. Осы жылдан не күтесіз? Жастарға не дейсіз? – Құрдастарыма, жастарға айтарым еш қорықпай алға қарай ұмтылыңыздар. Мақсат пен арманға жету жолында аянбай еңбек ету керек. Үміт артқан ата-­ананың, елдің сенімін ақтайық. Барлық қыз­-келіншектерді келіп жеткен мерекелеріңізбен шын жүректен құттық­таймын! Гүлдей құлпырып жүре беріңіздер! Еліміз аман, жұртымыз тыныш болғай! - Сұхбатыңызға рақмет!

Зухра ӘБДІЛ-САТТАР