Шетел білімі – отан игілігіне

«Отпан тау» тарихи-мәдени кешенінде елден жырақ білім алған жастардың қатысуымен «Шетел білімі – отан игілігіне» деп аталатын кездесу өтті. Онда Қытай мұнай университетінің түлектері Саламат Айдарбек пен Ерсұлтан Исламов өз тәжірибелерімен бөлісті. Сондай-ақ бұл шараға Жыңғылды ауылының Е.Айшуақұлы атындағы орта мектебінің биылғы түлектері қатысты. Шетелде білім алып келген мамандардың болашаққа қадам басқалы отырған жастарға айтары мен берері көп. Өз әсерімен бөлісіп, ақы­лы мен ізгі тілегін білдіргендердің бірі Ерсұлтан Исламов 2009 – 2011 жылдар ара­лығында қытай тілін меңгеріп, 2011 жылы Қытай мұнай универ­ситетіне түсіп, 2015 жылы «Мұнай ісі» мамандығын аяқтаған. Бүгінгі күнде ол – «Қаражанбасмұнай» АҚ компаниясының қызметкері. – Қытайда шетелдіктерге деген құрмет өте ерекше. Конфуцийдің «Алыстан қонақ келсе, ол – қуа­ныш емес пе?» деген сөзі бар, олар осы философиямен өмір сүріп, соны өздеріне негіз қылып алатын сияқты. Алайда Қытайда жүріп елімнің қара наны алтыннан да қымбат екенін түсіндім. Қазақ бо­лып қалу – басты міндетің, қазақ болып қалып қазақ мәдениетіне лайықты болуың адамзатқа қос­қан ең үлкен үлесің, – деп қанатты сөздерімен ойын жеткізді. Айдарбек Саламат 2011 жылы Қытай мұнай университетінің Гео­логия, мұнай барлау факультеті­не түсіп, 2016 жылы бітірген. Ал қазір Саламат – Маңғыстаудағы «Си Бу» компаниясының инженер маманы. – Қытай мұнай университеті мұнай саласын оқытатын жоғары оқу орындарының алдыңғы қата­рында. Білім ордасының дәре­жесін түсірмеу үшін студенттерге барлық  жағдай  жасалған.  Бі­рақ білімгерге қойылатын талап одан да жоғары. Оқимын дейтін адамға мұғалімдер ықпал жасай­ды. Қытайда студенттер мұғалімді айрықша құрметтейді. Сол жер­де мен ұстаздың биік шыңын көрдім,– дейді ол. Тарихи­-мәдени кешеннің экс­курсия және тарих бөлімінің меңгерушісі Жомарт Айдарбек кешен тарихы жөнінде қысқаша мағлұмат беріп, ұйымдастыры­лып отырған кездесудің ма­ңыздылығын атап өтті. Сонымен қоса бұл кездесу алдағы уақытта жыл сайынғы дәстүрге айнала­тын шара болады деп сенім біл­дірді. «Адамзат баласының қол жеткізген ұлы игіліктерінің бірі – білім қазынасы»,– дейді. Шетел­ден меңгерген тәжірибелерімен өз елінде қызмет жасап жүрген жас мамандардың қатары күн са­нап артып келеді. Ал бұл жағдай еліміздің дамуы мен көркеюіне үлес қосары сөзсіз.

Махаббат НҰРЖАНҚЫЗЫ