Нағыз сарбаз

Тәуелсіз еліміздің көк байрағы желбіреп, бүгінде ана мен баланың тыныш ұйқысы бақытына иеміз, шүкір! Тәуелсіздік – таңбасы таста, қаны қара жердің тамырында жатқан құдіретті сөз. Бұл бақытқа біздер, аталарымыздың қаны мен батырларымыздың найзаларының ұшымен қорғалған кең-байтақ жерімізді бүтіндей сақтап жеттік. Қазақ сонау заманнан батырлығымен, қайсарлығымен ерекшеленген. Тарихта өз жері мен елі үшін жан пида болған қазақ жалпы жер бетіндегі бейбіт өмір үшін күрескен. Соның бірі де бірегейі - ауған соғысындағы қазақ баласының үлесі. Ауған соғысы – Кеңес одағы тұсындағы тарихтың ең қайғылы беттерінің бірі. Кеңес әскерінің ауған жерінен толықтай шыққанына, міне, 30 жыл толды. Сол соғысты көзімен көріп, отжалын құшағында болып, елге аман-есен оралып, сот корпусында биік абыроймен қызмет етіп жүрген абзал да адал жан жайлы сыр шерткім келіп отыр. Елімізде, оның ішінде аймағымызда тәуелсіздік тұғырының құқықтық негіздерін нығайтуға үлес қосып жүрген судьялардың бірі, ауған соғысының ардагері – Ғабит Бастаубаев. Ғабекеңнің газет-журнал бетіне шыққан мақалаларын байқағаным, оның бірде-бірінде суреті жоқ екен. Осы жағдайды өзіне айтқанымда, ол өзіне тән күлімдеген қалпында «мен суретімді жариялағанды ұнатпаймын» деп әзілдеді. Қазақта «әзілің жарасса, атаңмен ойна» деген сөз бар емес пе, мен де қалыспадым «не бұрынғы ғашықтарыңыз көріп қоя ма, әлде ауғандар танып қоя ма?» деп едім, Ғабекең жалт етіп қарап, «Гүлажар, ол соғыс әңгімесін қайтесің, еске түсірмейік. Шүкір, қазіргі қой үстіне бозторғай жұмыртқалаған бейбіт өмірді қадірлейік» деді. Сол әңгіме астары сонау алғашқы таныстықты, қызмет жолын, одан әрі соғыс жылдарын еске түсіруге себеп болды. Ғабит Балтабайұлын мен өзім 2005 жылы судья қызметіне келген кезден танимын. Бір көргеннен көп сөйлемейтін, сөйлесе нақты ғана тұжырымды айтатын, кез келген тақырыптағы сұхбатты қолдай білетін, терең білімді, көзінде кішкене сыры бар, өте салмақты азамат ретінде әсер қалдырды. Қазіргі таңда бір ұжымда қызмет еткенімізге 14 жылдай уақыт өтсе де, сол мінездемені өзгерткен жоқпын. Ол 1966 жылы 15 қазанда Жамбыл облысы, Жуалы ауданы, Жаңа-Талап селосында туған. Мамандығы бойынша еңбек жолын 1993 жылы Алматы қаласының Октябрь, Калинин аудандық халық соттарының сот орындаушысы болып бастап, Алматы қалалық халық сотының аға сот орындаушысы қызметін атқарған. Қазақстан Республикасы Президентінің 1998 жылғы Жарлығымен Астана қалалық сотының судьясы қызметіне тағайындалған. Ал Қазақстан Республикасы Әділет министрінің 1999 жылғы 12 ақпандағы бұйрығына сәйкес Алматы қаласының Бостандық аудандық сотының судьясы қызметіне ауысады. Ел Президентінің 2003 жылғы 29 сәуірдегі Жарлығымен Маңғыстау облыстық сотының судьясы болып тағайындалып, киелі де қарт түбектен бір-ақ шығады. Бүгін, міне, 16 жылдан бері осы қызметті қалтқысыз атқарып келеді. Ол 2006–2008 жылдар аралығында Қазақстан  Республикасы Судьялар одағының Маңғыстау облыстық филиалының Сот әдебі жөніндегі комиссиясының төрағасы болып аталмыш жұмысты жоғары деңгейде атқарды. Осы кезде Ғабит Бастаубаевтың ешкімнің айтқанын тыңдамай, тек қана әділдік пен адалдық қағидаларымен алдына келген судьялардың тағдырын шешіп отырғанының талай куәсі болғанбыз. Ол жас судьяларға тәлімгерлік етіп, ұдайы тәжірибелік көмек көрсетіп келеді. Күнделікті кабинетінің алдында кеңес сұрап, жол іздеп келіп тұрған жас судьяларды жиі кездестіреміз. Оның өз ісінің маманы екендігі сондай күрмеуі ауыр, шешілуі қиын істерді айта бастағаннан «түсіндім» деп, ары қарай өзі егжей-тегжейлі түсіндіруге кіріседі. Енді Ғабекеңнің Маңғыстауға деген махаббатын аз-кем айта кетуді жөн көрдім. Ол әрдайым демалыс уақытын тек қарт Каспийдің құшағында өткізеді. Иә-иә, құшағында дейтінім, Ғабекең суға сүңгу спортын өте жақсы көреді. «Мен зейнетке шыққан кезде де Ақтаудан кетпеймін, Каспий деген сұлуды тастауға күш-жігерім жетпес», – дейді өзі. Ол сот төрелігін жүзеге асырудағы еңбектің жоғарғы сапасын қамтамасыз еткені үшін 2010 жылы «Сот жүйесінің құрметті қызметкері» белгісімен, 2011 жылы Қазақстан Республикасы Жоғарғы соты төрағасының,2012  жылы  Судьялар одағының «Құрмет  грамоталарымен», 2013 жылы Ақтау қаласы әкімінің «Ақтау қаласына 50 жыл» медалімен және Қазақстан Республикасы Жоғарғы сотының ІІІ дәрежелі «Мінсіз қызметі үшін» медалімен марапатталған. Сонымен бірге әр жылдары облыстық сот төрағасының алғыстарын да иеленген. Бүгінгі ел ағасы Ғабекең, жан жары Гүлшара екеуі ұл-қыз тәрбиелеп, немере қызықтаған жанұяның бәйтерегіне айналып отыр. Ғабит Балтабайұлының нағыз сарбаздың бойындағы тік мінезі, қайсарлығы, шыдамдылық қасиеттері бүгінгі ұрпаққа үлгі-өнеге дер едім.

Гүлажар БАҚЫТЖАНОВА, Маңғыстау облыстық сотының судьясы