Кеңес әскерінің ауған жерінен шығарылғанына 30 жыл толды

©

Ауған соғысы – Кеңес Одағы тұсындағы тарихтың қайғылы беттерінің бірі. Он жылға жуық бөтен елдің мүддесін қорғаған Ауғанстандағы шектеулі контингент әскерлері құрамында Қазақстаннан 22 269 жауынгерлер өздерінің интернационалдық міндетін атқарды. 1979 жылдың 27 желтоқсанында КСРО Қарулы күштері Ауғанстанға кіргізілген еді. Бұл қасірет ауған елінің тек өз ішінде ғана емес, оған сырт мемлекеттердің қатысуымен ұзаққа созылды. 1989 жылдың 15 ақпанында Кеңес Одағының әскері ауған жерінен шығарылды. Міне, содан бері тура 30 жыл өтіпті. Жалпы еліміз және ардагерлеріміз үшін 10 жылға жуық уақытқа созылған сол соғыстың жарасы әлі жазыла қойған жоқ, ресми деректерге сүйенсек, қазақ елінен аттанған ұландарымыздың 21-і із-түзсіз жоғалып кеткен, 924 сарбазға ауған жерінен топырақ бұйырған. 1015 арыстай азамат елге мүгедек болып оралған. Қаншама қазақ отбасына қасірет әкелген айдаладағы Ауғанстан соғысы біз үшін осылай аяқталған болатын. Сондықтан жыл сайын ардагер ағаларымыз осы соғыста қаза болған қаруластарының қабіріне барып, тағзым етіп, еске алады, сүйегі шетелде қалғандарға бағыштап құран оқылады. 2019 жылдың ақпанына дейін Бейнеу ауданы көлемінде Ауғанстан жерінде Отан алдындағы борышын өтеп, елге оралмаған отандастарымыздың әруақтарына арналып мәңгілік алау ескерткішіне гүл шоғын қою рәсімі, салтанатты іс-шаралар және жалпы білім беру ұйымдарында әскери-патриоттық тәрбиелік мәні бар ардагерлермен оқушылардың кездесулері ұйымдастырылды. Кездесулер барысында Ауған соғысы ардагерлері болашақ Отан қорғаушыларға өздерінің жүріп өткен жолдары, соғыста көрген қиыншылықтары және өздерінің басынан өткерген оқиғалары туралы әңгімелеп, оларды болашақта елін, жерін қорғауға аянбай күш-жігер жұмсауға, өз елінің шын патриоты болуға бағыттады. Биыл жастары он жетіге толатын, аудандық қорғаныс істері жөніндегі бөлімнің шақыру учаскесіне әскерге шақырылушы болып тіркелген мектеп оқушыларына әскерге шақырылушының тіркеу куәліктерін салтанатты түрде тапсыру жоспарланған. Ауғанстаннан Кеңес әскерінің шығарылғанына 30 жыл өтсе де сол кездегі жауынгерлер - бүгінгі бейбіт өмірдің еңбеккерлері соғыс жарасынан айыға алмай келеді. Ауған соғысының тарихи мағыналық ақиқатын ашу, тәуелсіздік жолында күрескен ағаларымыздың ерлігін кейінгі ұрпаққа үлгі ету, бүгін өзімізбен бірге елінің көсегесін көгертуге атсалысып жүрген ардагер жауынгерлерді қадірлеп, құрметтеу біздің борышымыз болып табылады.

Қ.НАРЫМБАЕВ, Бейнеу ауданының қорғаныс істері жөніндегі бөлімі бастығының орынбасары