Ақтау қаласында өткен «Театрдың ғажайып әлемі» атты театр өнерінің облыстық фестивалінде Бейнеу ауданының театр ұжымы гран-при алды, деп хабарлайды mangystaumedia.kz сайты аудан әкімдігінің баспасөз қызметіне сілтеме жасап.
Байқауға Бейнеу гимназиясынан «Шамшырақ» театр ұжымы қатысты. Өнер ұжымы Мұқағали Мақатаевтың драма жанрындағы «Қош, Махаббат» қойылымын қойды.
Театр сайысына қатысқан командалардың ішінен бейнеулік топ үздік шығып, аталмыш байқаудың республикалық кезеңіне жолдама алды.
Фестиваль-байқаудың мақсаты - өскелең ұрпақты рухани-адамгершілік, эстетикалық тәрбиелеудің, тұлғаның үйлесімді дамуының факторы ретінде балалар мен жастар театр шығармашылығын дамыту, өзін-өзі көрсетуге, бейнелі түсіну сияқты бірегей қабілеттерді қалыптастыру.
- Фестивальдің облыстық кезеңінде барлық аудан мен қаладан 8 команда қатысты. Сайыс өте тартысты өтті. Әр ауданнан келген мықтылардың өнері бірінен-бірі өтті. Біздің топтың бабы да, бағы да қатар жанып, бас жүлдені жеңіп алдық. Қазылар алқасы әділ бағасын берді деп ойлаймын. Ендігі жерде Республикалық кезеңге дайындалатын боламыз, - деді театр жетекшісі Жанар Дәрменбаева.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
