Жұлдыздар жарқыраған кеш

1 наурыз елімізде жалпыхалықтық мереке – Алғыс айту күні. Бұл күні қазақстандықтар бір-біріне құрмет көрсетіп, ризашылығын білдіреді. Алғыс айту күні – қазақстандық патриотизмнің, бірлік пен достықтың жарқын мерекесі. Тәңірдің жарылқап, құтымызды көбейтетін, ырысымызды арттырып, Қазақстан халқын мәңгілікке біріктіруге бағытталған Алғыс айту күнінде Бейнеудегі «Абыл» мәдениет үйі ұжымының ұйымдастыруымен «Екі жұлдыз» шоу концерті өткізілді. «Екі жұлдыз» шоу концерті Бейнеу ауданында осымен екінші  рет өткізіліп отыр. «Ел іші-өнер кеніші» демекші, концертке қоғамда түрлі салада қызмет атқарып жүрсе де, жүректері өнер деп соғатын өзге мамандық иелері мекеме, кәсіпорын басшылары мен қызметкерлері және кәсіпкерлер, ауданымызға танымал өнерпаздар қатысты. Мерекелік концертте аудан әкімі Әбілов Бейнеубек құттықтау сөз сөйлеп, аудан тұрғындарын мерекемен құттықтап, жүрек жарды лебізін білдірді. Киелі сахна төрінде мекеме, кәсіпорын басшылары мен қызметкерлері, кәсіпкерлер аудан өнерпаздарымен бірге жұптасып, әуелете ән шырқады. Сондай-ақ  қатысушылардың бірі Талғат Кеңесбаев пен жеке кәсіпкер Гүлзира Асықбаева қылқаламмен сурет салу шеберлігінен көрермендерге «Көктем гүлі» композициясын көрсетті. Өнерпаздардың көрсеткен өнерлері мен салған сырлы сазды, әуезді әндері жиналған жұртшылықтың көңілдерін серпілтіп, ерекше қуаныш сыйлады. Мерекелік кеш соңында қатысушылар топтаса ән шырқап, аудан әкімі Б.Әбілов «Екі жұлдыз» шоу концертінің өнерпаздарына алғысын айтып, ықылас гүлін тарту етті.

Үміт ҚАЗДАЕВА