Жаңаөзенде 15 мыңға жуық адам латын әліпбиімен диктант жазды

ҚР Президенті – Елбасымыз Нұрсұлтан Назарбаевтың «Болашаққа бағдар: Рухани жаңғыру» мақаласы бойынша 14 қараша күні бүкіл Қазақстандағы сияқты Жаңааөзен қаласының тұрғындары латын әліпбиімен диктант жазды. Себебі Президенттің осы «Рухани жаңғыру» бағдарламасы – нақты құжат. Осы құжатта латын әліпбиіне көшу туралы нақты міндет қойылды. Латын әліпбиі – жаңғырудың қайнары. Әліпби арқылы ұлттық сана күшейеді. Әлемде болып жатқан жаңалықтар осы жазу арқылы қабылданады. Сондай-ақ бұл әліпби – қазақ тілінің төл табиғатын сақтауға мүмкіндік береді. Ел болашағы – жас ұрпақтың қолында. Латын қарпіне көшу – олардың білім және ғылым жолындағы ізденістеріне жол ашады. Бұл Қазақстан үшін дамыған 30 елдің қатарына қосылу бағытындағы игі қадам. Рухани жаңғыру – қазақ елінің жарқын болашағы.

Міне, осындай мәселелер тұрғысынан жалпыхалықтық диктант жазуға жаңаөзендіктер кірісіп кетті.

- Бүгінгі шара, яғни диктант жазу, бүкіл республика бойынша бір мезетте жүргізілді. Бізге жоғарыдан берілген тапсырмаға сәйкес осы диктант жазуға Жаңаөзен қаласы бойынша 15 мың адамды қамту керек делінген, - дейді Жаңаөзен қалалық мәдениет және тілдерді дамыту бөлімінің басшысы Ұлбазар Орынбаева. – Осы 15 мың адамды қамту үшін 15 жастан жоғары азаматтардың барлығына, мекеме, кәсіпорындарға, сондай-ақ бүкіл оқу орындарына түгел хабарладық. Соған байланысты айтылған мерзімде қаланың барлық жерінде диктант жазу жұмысы басталып, дер кезінде аяқталды. Осы бойынша қала әкімдігі қасынан арнайы комиссия жұмыс істеп тұр. Комиссия төрайымы – қала әкімінің орынбасары Сәнім Танаева. Мүшелері әртүрлі мамандардан сайланып бекітілген. Ал мекемелердегі диктант жазушылар үшін мектептердің қазақ тілі және әдебиеті пәні мұғалімдері мен оқу орындары үшін өздеріндегі оқытушылардан кіші комиссия құруға тапсырма берілді. Бұл шара, яғни диктант жазу небәрі 30 минуттың ішінде жалпы 80-90 сөз жазылуы тиіс. Бірінші, мәтінді толық тыңдайды, екінші, диктантты жаза бастайды, үшінші, жазып болып тыныс белгілерін қоюлары керек. Мұнда латын әліпбиін халықтың қалай қабылдап жатқандығы, емлемен танысып, әрі қарай алып кетуге дайындықтарын көзден өткізу болып есептеледі. Ал мекеме, кәсіпорындардың, мектептер мен оқу орындардың атаулары үстіміздегі жылдың ақпан айынан бері жазылып, маңдайшаларға ілініп жатыр. Жалпы 2025 жылға дейін халқымыз латын әліпбиіне өтуге, содан пайдалануға сақадай сай болуы көзделген. Мақсат осы. Айтпақшы, диктант жазуға келе алмайтын, жете алмайтындар үшін сағат дәл 10-ның кезінде өздерінің сартфондарын қосу арқылы tilalemi.kz сайтына кіріп, сол арқылы жазуларына әбден болады. Онда жұрт диктант жазып жатқан мәтін дыбысталған күйінде жүреді. Жазғандарын сканерлеп біздің бөлімге жіберетін болады. Жалпы диктанттың қортындысын шығаруға жұмысшы топқа 5 күн мерзім берілді. Қортындысы соған дейін нақты шығады деп ойлаймын.

Мұратбай ҰЛЫҚПАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.