Көшпелі кеңес алаңы

Маңғыстау облысының жастар ресурстық орталығы 30 тамыз – ҚР Конституциясы күніне орай, теңіз жағалауында «Кеңес алаңы» жобасы аясында жастарға жұмысқа орналасуға жәрдем беру, құқықтық және әлеуметтік кеңес беру, діни экстремизмнің алдын алу, психологиялық және медициналық көмек, кәсіпкерлікті қалай бастау жөнінде және баспаналы болу үшін қандай мемлекеттік бағдарламаларға назар аудару керектігі туралы кеңес беру мақсатында, жастарға қолдау көрсету бағытында арнайы көшпелі кеңес беру шарасын ұйымдастырды.

Жастар және қала тұр­ғындарымен кездесу­ге Ақтау қалалық әлеуметтік бағдарламалар және жұмыспен қамту орталығы, Маң­ғыстау облысының «Жаңа серпін» орталығы, «Даму» қоры Маң­ғыстау облыстық аймақтық фили­алы, Маңғыстау облысының дін басқармасы, № 1 Ақтау қалалық емханасы, «Freedom finance» қар­жылық қоры және ҚР Ұлттық банкінің Маңғыстау облысы бо­йынша филиалының өкілдері мен «БанкЦентрКредит» АҚ­-ның, соны­мен қатар Маңғыстау облысының салауатты өмір салтын ұстану орталығының мамандары арнайы ша­қырылды.

Көшпелі кеңес алаңын ұйымдас­тырудағы шараның мақсаты тура­лы Маңғыстау облысының жастар ресурстық орталығының директоры Досан Жеткізген:

– Жыл басынан бері «Кеңес алаңын» ұйымдастыруды жоспарға енгізген болатынбыз.  Жобаның басты мақсаты – жастарды мемле­кеттік бағдарламалармен таныс­тырып, олар ұсынатын мүмкіндік­терді түсіндіру. Жұмыспен қамту бағытындағы оң өзгерістерден ха­бардар ету. Діни экстремизмнен бойды аулақ ұстап, кәсіп ашу тетік­терін үйрету. Төмен мөлшермен несие алып, іс бастауына жол аша­мыз. Көпшілікті Елбасының «5 әлеуметтік бастамасы» негізінде жүзеге аса бастаған «7-­20­-25» бағ­дарламасы қызықтырып отыр. Бұл салаға қатысты сұрақтарға ҚР Ұлт­тық банкінің Маңғыстау облысы бойынша филиалының өкілдері мен екінші деңгейлі банк қызметкерлері жауап беріп жатыр, – деді өз сөзінде.

Сонымен қатар көшпелі кеңес алаңын ұйымдастыру арқылы түрлі саланың мамандарын қатыстыра отырып, қала тұрғындарына, әсіре­се жастарға жан-­жақты кеңестер берілді.

– Біз бұл жобаны әртүрлі фор­матта өткіземіз. Жыл басынан бері адамдар көп жиналатын әлеу­меттік кешендер мен сауда орта­лықтарында кеңес беруді ұйым­дастырдық. Бүгін, міне, екінші мәрте қала тұрғындары мен жастар жиі бас қосатын теңіз жағалауында өткізіп отырмыз. Алдағы уақытта аудандар мен ауылдарға баруды жоспарлап қойдық, – деді Маң­ғыстау облысының жастар ресурс­тық орталығының директоры Досан Жеткізген.

Маңғыстау облысының жастар ресурстық орталығы Ақтау тұр­ғындарына бір мезетте түрлі са­ланың мамандарынан кеңестік көмек алу мүмкіндігін ұсынды. Бұл мүмкіндіктің әрбір адамның уа­қытты үнемдеп, өзін толғандырған өзекті мәселесі бойынша көкейінде жүрген сауалын кез келген саланың маманына қою арқылы түйткілді мәселенің түйінін шешуге жол аша­тыны анық.

Ұйымдастырылған шара бары­сында ҚР Ұлттық Банкінің Маң­ғыстау облысы бойынша филиа­лының және «БанкЦентрКредит» АҚ­-ның өкілдері Елбасы Н.На­зарбаевтың «Президенттің бес әлеуметтік бастамасы» бойынша Қазақстан халқының тұрғын үйге қол жеткізуіне жол ашатын, «7­-20­-25» бағдарламасының жүзеге асырылу механизмдері, осы бағ­дарлама арқылы баспаналы болу үшін қандай қадамдар жасалуы тиіс деген мәселелер төңірегінде қала тұрғындарына түсіндіру жұ­мыстарын жүргізді және олардың сауалдарына жауап берді.

Баспана кез келген адамның тұр­мыс­-тіршілігіндегі ең басты қа­жеттілік деп санайтын болсақ, Президент ұсынып отырған жаңа бағдарлама тұрғындардың баспана­ға қолжетімділігін бұрынғыдан да жеңілдетейін деп отыр. Сондықтан «7­-20-­25» бағдарламасы бойын­ша баспана алу үшін не істеу ке­рек? Бағдарламаға қалай қатысуға болады? Банктер тарапынан қан­дай  құжаттар  талап  етіледі? деген сияқты сауалдарға жауап іздеген Ақтау қаласының тұрғындары көш­пелі кеңестің аясында баспаналы болудың түрлі мүмкіндіктері туралы банк өкілдерінің өз аузынан естіп, мол мағлұматтарға қанықты.

Көшпелі кеңес беру алаңында жастарға облыстық дін істері бас­қармасының теолог мамандары­нан діни тұрғыдағы туындаған сұрақтарға толыққанды жауап алу мүмкіндігі ұсынылды.

Сонымен қатар шара барысын­да қала тұрғындары №1 Ақтау қалалық емхана қызметкерлерінен денсаулыққа қатысты туындаған түрлі сауалдарына жауап алып, қан қысымын, салмақтарын өлшетті. Маңғыстау облысының салауатты өмір салтын ұстану орталығының психолог-­маманына жүгінгендер өздерін толғандырған мәселелері бойынша кеңестер алды.

Өз ісін бастауға бет бұрып, алайда түрлі кедергілерге тап бо­лып, кәсіпкерлікте табысқа жету мүмкіндігін таба алмай қиналып жүрген жастар «Даму» қоры Маңғыстау облыстық аймақтық филиалының өкіліне жолығу ар­қылы шара барысында өз мәселе­сінің түйінін шешуге бір қадам жақындай түсті.

Ақтау қалалық әлеуметтік бағдар­ламалар және жұмыспен қамту орталығы мен Маңғыстау облысы­ның «Жаңа серпін» орталығы «екі қолға бір күрек таппай жүрген» қала тұрғындарына бос жұмыс орында­рын ұсынатын мекемелердің тізімін ұсынып, мамандығын өзгертіп, жаңа кәсіпті меңгергісі келетіндерге арналған қайта даярлау курстары жайлы мәліметтермен таныстырды. Кез келген маманнан кеңес алу тегін түрде жүргізілді. Өзіне ұсы­нылып отырған тамаша мүмкіндікті жастар қуана қарсы алды, теңіз жағалауында серуендеп жүрген қала тұрғындары да бұл шарадан қалыс қалмады. Әркім өзіне қажетті маманның кеңесін толығырақ алуға тырысты.

Осылайша облыстық жастар ре­сурстық орталығы Ақтау қаласы­ның тұрғындары мен жастары үшін түрлі саланың мамандарымен бір мезгілде кездесіп, кеңес алу мүм­кіндігін ұсынды.

Шара барысында 300-­ге жуық қала тұрғыны түрлі мамандардың кеңесіне жүгінді.

Зухра ӘБДІЛ-САТТАР

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.