Жаңаөзенде грек-рим күресінен I республикалық ашық турнир өтті

Жаңаөзен қаласының 50 жылдығы және қоғам қайраткері Тобанияз Әлниязұлының құрметіне орай 2001-2003, 2004-2006 жылы туылған жасөспірімдер арасында грек-рим күресінен I Республикалық ашық турнирі өтті.

Рахмет Өтесінов атындағы дене шынықтыру-сауықтыру спорт кешенінде демалыс күндері өткен жарысқа Өзбекстан, Түркменстан, Қарақалпақстан Республикалары, Оңтүстік Қазақстан, Қызылорда, Ақтөбе, Атырау, Маңғыстау облыстарынан 19 команда, 300-ге жуық спортшы қатысты. 2001-2003 жылы туылған жас балуандар 55, 60, 65 салмақ дәрежесі, 2004-2006 жылғылар 29, 32, 35, 38, 41, 45, 48, 51 салмақ дәрежесі бойынша бақ сынасты.

Турнирдің ашылу салтанатына 2004 жылы Афинада өткен бокстан Олимпиада чемпионы, Вел Баркер кубогының иегері, «Astana Arlans» кәсіпқой бокс клубының директоры Бақтияр Артаев, грек-рим күресінен Қазақстан құрамасының мемлекеттік жаттықтырушысы Мейірхан Рахметов, қала әкімінің орынбасары Исахан Сағынбаев, «ӨзенМұнайСервис» ЖШС директоры Нұрсейіт Сүйінов қатысып, спортшыларға сәттілік тіледі.

Екі күнге созылған жарыста жаңаөзендік палуандар жүлделі орындарды иеленді. ІІІ орын Сағди Аманжолұлына (32 келі), Шыңғыс Базарбайға (48 келі), Бекзат Жұбантұрға (60 келі) бұйырды. Әділет Қожахметов (35 келі) ІІ орынды місе тұтса, ал Жанболат Баян (45 келі), Алихан Жаңбыр (60 келі), Азамат Қыдырқожа (65 келі) І ші жүлделі орынан көрінді. Командалық есеп бойынша 3 алтын медальмен Жаңаөзен қаласы алғы шепке шығып, 1-ші орынды иеленді. Ақтау қаласы 21 алтынмен 2-ші орынға, Шымкент қаласы 1 алтынмен 3-ші орынға жайғасты.

Республикалық турнирге қатысқан спортшыларымыз спорт шеберіне үміткер атағына ие болды. Жүлдегерлерге диплом, медаль және бағалы сыйлықтар табысталды.

Меруерт ТЕҢЕЛБАЕВА, Қалалық дене шынықтыру және спорт бөлімінің инспекторы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.